ABA និងក្រុមហ៊ុន Localize សហការគ្នា សម្រួលដល់ការចេញវិក្កយបត្រឌីជីថល សម្រាប់សហគ្រាសធុនតូច និងមធ្យម
15/Jan/2024
នៅក្នុងទិសដៅសហការជាយុទ្ធសាស្ត្រ ធនាគារ ABA និងក្រុមហ៊ុន Localize Tech Solution Co., Ltd បានដាក់ដំណើរការជាផ្លូវការនូវមុខងារថ្មីមួយគឺ វិក្កយបត្រឌីជីថលជាមួយនឹង ABA Payway នៅថ្ងៃទី 12 ខែមករា ឆ្នាំ 2024។ ពិធីសម្ពោធដាក់ដំណើរការនេះ ត្រូវបានធ្វើឡើងនៅមជ្ឈមណ្ឌលបណ្ដុះធុរកិច្ចថ្មី “តេជោ” ដែលជាជំហានជោគជ័យដ៏សំខាន់មួយ ក្នុងការសម្រួលដំណើរការចេញវិក្កយបត្រសម្រាប់សហគ្រាសធុនតូច និងមធ្យម (SMEs)។
ការអភិវឌ្ឍប្រកបដោយនវានុវត្តនេះ បង្ហាញពីការភ្ជាប់ប្រព័ន្ធសេវាទូទាត់អនឡាញរបស់ ABA PayWay ទៅក្នុងមុខងារទូទាត់វិក្កយបត្របច្ចុប្បន្នដែលមានស្រាប់របស់ប្រព័ន្ធ LocalizeBook តាមរយៈការភ្ជាប់ API។ ឥឡូវនេះ អ្នកប្រើប្រាស់ LocalizeBook អាចចេញវិក្កយបត្រយ៉ាងងាយស្រួល ដោយភ្ជាប់ជាមួយ ABA KHQR ស្វ័យប្រវត្តិតាមប្រព័ន្ធ Localize តែម្ដង ដោយមិនចាំបាច់ធ្វើការផ្ទាល់ជាមួយធនាគារ ABA ឡើយ។
ប្រព័ន្ធ LocalizeBook រឹតតែជួយសម្រួលដល់បទពិសោធក្រោយពេលទូទាត់ ដោយប្រព័ន្ធនេះនឹងជូនដំណឹងដល់អ្នកប្រើប្រាស់ អំពីទឹកប្រាក់ទូទាត់ ដែលទទួលបានតាម KHQR ហើយធ្វើបច្ចុប្បន្នភាពអំពីស្ថានភាពទូទាត់នៅក្នុងប្រព័ន្ធ និងចេញបង្កាន់ដៃទទួលប្រាក់ជូនអតិថិជនវិញដោយស្វ័យប្រវត្តិ។ មុខងារនេះបង្កើនប្រសិទ្ធភាព និងភាពងាយស្រួល សម្រាប់សហគ្រាសធុនតូច និងមធ្យម ដោយអនុញ្ញាតឲ្យពួកគាត់អាចគ្រប់គ្រងដំណើរការចេញវិក្កយបត្រ ដោយមិនចាំបាច់ចំណាយធនធានច្រើន។
លោក Zokhir Rasulov នាយកឌីជីថលរបស់ធនាគារ ABA បានគូសបញ្ជាក់អំពីផលវិជ្ជមាននៃភាពជាដៃគូនេះថា "គោលបំណងរបស់យើងខ្ញុំ គឺដើម្បីផ្តល់ជូនសហគ្រាសធុនតូច និងមធ្យម នូវដំណោះស្រាយដែលងាយស្រួលប្រើប្រាស់ និងប្រកបដោយប្រសិទ្ធភាពខ្ពស់ សម្រាប់តម្រូវការចេញវិក្កយបត្រ និងការទូទាត់របស់ពួកគាត់។ ការភ្ជាប់ប្រព័ន្ធរបស់ ABA PayWay ជាមួយ LocalizeBook គឺធ្វើយ៉ាងណាឲ្យដំណើរការទាំងនេះមានភាពងាយស្រួល និងផ្តល់នូវបទពិសោធអាជីវកម្មដ៏រលូន”។
ខណៈដែលក្រុមហ៊ុន Localize ជាអ្នកដឹកនាំ និងផ្ដួចផ្ដើមកិច្ចខិតខំប្រឹងប្រែងរួមគ្នានេះ តួនាទីដ៏សំខាន់របស់ធនាគារ ABA ដែលជាដៃគូចម្បង បានបញ្ជាក់ពីការប្តេជ្ញាចិត្តរបស់ខ្លួនចំពោះនវានុវត្តន៍នៅក្នុងទិដ្ឋភាពវិក្កយបត្រឌីជីថល។
ភាពជាដៃគូរវាងស្ថាប័នទាំងពីរ គឺលើសពីការភ្ជាប់ប្រព័ន្ធនេះ – តួយ៉ាង កាលពីខែឧសភា ឆ្នាំ 2023 ABA បានដាក់បញ្ចូល ប្រព័ន្ធ LocalizeBook ដោយជោគជ័យ ទៅក្នុងផ្លែតហ្វម ABA Business ដ៏រឹងមាំរបស់ខ្លួន។ ការរួមបញ្ចូលរបស់ ABA Business ជាមួយ LocalizeBook ផ្តល់នូវអត្ថប្រយោជន៍ថ្មីៗជាច្រើនដល់អតិថិជន ដោយសម្រួលដល់ផ្នែកសំខាន់នៃកិច្ចការចុះបញ្ជី គណនេយ្យរបស់ពួកគាត់បានដោយផ្ទាល់, កាត់បន្ថយកំហុសឆ្គងដែលបង្កឡើងដោយមនុស្ស និងផ្តល់របាយការណ៍ថ្មីចុងក្រោយ ដើម្បីជាជំនួយដល់ការសម្រេចចិត្តអាជីវកម្ម តាមរយៈការភ្ជាប់គណនីធនាគារទៅក្នុងកម្មវិធីគណនេយ្យដោយស្វ័យប្រវត្តិ និងផ្ទៀងផ្ទាត់ប្រតិបត្តិការ។
អំពីក្រុមហ៊ុន Localize៖
ក្រុមហ៊ុន Localize គឺជា អ្នកត្រួសត្រាយលើធុរកិច្ចផ្នែកឌីជីថលក្នុងស្រុក ដែលផ្គត់ផ្គង់ប្រព័ន្ធគ្រប់គ្រងគណនេយ្យអនឡាញសម្រាប់សហគ្រាសធនតូច និងមធ្យមឈ្មោះ (LocalizeBook)។ ជាមួយបេសកម្ម ដែលផ្ដោតលើការប្រើប្រាស់បច្ចេកវិទ្យាឌីជីថល Localize មានគោលបំណងលើកកម្ពស់សហគ្រាសធនតូច និងមធ្យម ជាមួយនឹងការអនុវត្តកិច្ចគណនេយ្យត្រឹមត្រូវ និងមានរបាយការណ៍ហរិញ្ញវត្ថុច្បាស់លាស់។
សម្រាប់ព័ត៌មានបន្ថែម សូមតាមដាននៅលើបណ្ដាញសង្គមរបស់ Localize ឬចូលទៅក្នុងឆានែលតេលេក្រាម LOCALIZECHANNEL។