ធនាគារ ABA និង ផ្សារទំនើបអ៉ីអនម៉ល សហការក្នុងការបង្កើនការទូទាត់ដោយមិនប្រើសាច់ប្រាក់សម្រាប់ប្រជាជនកម្ពុជា
19/Oct/2021
ធនាគារ ABA ជាធនាគារឈានមុខផ្នែកសេវាធនាគារឌីជីថលនៅកម្ពុជា និងផ្សារទំនើប AEON MALL CAMBODIA ជាក្រុមហ៊ុនឯកទេសអភិវឌ្ឍ និងប្រតិបត្តិការផ្សារទំនើបដែលកំពុងគ្រប់គ្រងលើ AEON MALL Phnom Penh និង AEON MALL Sen Sok City បានចុះហត្ថលេខាលើការទទួលការទូទាត់ប្រាក់បែបអេឡិកត្រូនិក ដើម្បីផ្ដល់ភាពងាយស្រួល និងសុវត្ថិភាពដល់អតិថិជន AEON MALL។
ក្រោមភាពជាដៃគូនេះ អតិថិជន ABA នឹងពុំចាំបាច់ពិបាកក្នុងការកាន់ក្រដាសប្រាក់ដើម្បីទូទាត់ទៀតឡើយ ដោយគ្រាន់តែស្គែន ABA PAY QR នៅបញ្ជរបង់ប្រាក់តាមរយៈ ABA Mobile។ លោកអ្នកអាចស្គែន QR ដើម្បីទូទាត់បានជាង 200ហាង និងផ្សារទំនើបទាំងពីរសាខារបស់ AEON MALL ។ ABA QR នេះមាននៅលើម៉ាស៊ីនទូទាត់ POS និង QR ជើងបញ្ឈរ (Static Stand) ដែលនាំមកនូវភាពងាយស្រួល និងសុវត្ថិភាពដល់ការទូទាត់ប្រាក់។
បន្ថែមលើនេះទៀត ធនាគារ ABA ក៏បានក្លាយជាដៃគូរយុទ្ធសាស្ដ្ររបស់ AEON MALL Sen Sok City ក្នុងការផ្ដល់ជូននូវឧបករណ៍ប្រមូលសាច់ប្រាក់ដែលទំនើប និងសុវត្ថិភាពតាមរយៈមាស៊ីនស្វ័យសេវា និងបញ្ជរ។ ក្នុងពេលជាមួយគ្នានេះដែរ AEON MALL នឹងប្រើប្រាស់សេវាធនាគារអនឡាញ ABA សម្រាប់អាជីវកម្ម ធ្វើជាឧបករណ៍គ្រប់គ្រងហិរញ្ញវត្ថុពេញលេញ។
លោក Madi Akmambet អភិបាលប្រតិបត្តិនៃធនាគារ ABA មានប្រសាសន៍ថា៖ “យើងមានសេចក្ដីរីករាយក្នុងការប្រកាសជាផ្លូវការពីភាពជាដៃគូលើការទូទាត់ប្រាក់បែបអេឡិកត្រូនិក និងសេវាប្រមូលសាច់ប្រាក់។ យើងខ្ញុំជឿជាក់ថាដំណោះស្រាយដ៏ទំនើប និងងាយស្រួលរបស់ ABA នឹងផ្ដល់អត្ថប្រយោជន៍ដល់ពាណិជ្ចករ ក៏ដូចជាអតិថិជនរបស់ AEON MALL រាប់លាននាក់។ នេះគឺជាការបន្ដការរួមចំណែករបស់ធនាគារ ABA ក្នុងការចូលរួមអភិវឌ្ឍបន្ថែមលើវិស័យហិរញ្ញវត្ថុ និងសេដ្ឋកិច្ចឌីជីថលប្រកបដោយបរិយាបន្ននៅក្នុងប្រទេសកម្ពុជា។”
លោក Tsuboya Masayuki អគ្គនាយកក្រុមហ៊ុន AEON MALL បានមានប្រសាសន៍ក្នុងឱកាសនេះថា “ជាបឋមយើងខ្ញុំ សូមសម្ដែងនូវការពេញចិត្ត និងកោតសរសើរចំពោះកិច្ចសហប្រតិបត្តិការ និងភាពជាដៃគូជាមួយជាមួយធនាគារ ABA។” យើងខ្ញុំជឿជាក់ថា អតិថិជនរបស់យើងនឹងរីករាយជាមួយនឹងការសហការលើការទូទាត់ប្រាប់បែបអេឡិចត្រូនិចនៅក្នុងផ្សារទំនើបរបស់យើង។ ជាចុងបញ្ចប់ AEON MALL មានបំណងផ្ដល់នូវបរិយាកាសរស់នៅបែបកម្សាន្ដជូនអតិថិជនដូចនឹងបេសកកម្មរបស់យើង “បំពេញជីវភាពប្រចាំថ្ងៃ នៅកម្ពុជា ជាមួយនឹងលទ្ធភាពថ្មី” ។
ធនាគារ ABA និងផ្សារទំនើប អ៉ីអនម៉ល គឺជាស្លាកសញ្ញាល្បីឈ្មោះមួយក្នុងប្រទេសកម្ពុជានៅលើវិស័យទីផ្សាររបស់ខ្លួន។ ដោយសារវឌ្ឍនភាពឌីជីថល និងវត្តមានធនាគារឌីជីថលដែលអាចប្រើប្រាស់បាន ធនាគារ ABA ត្រូវបានទទួលស្គាល់ទាំងជាតិ និងអន្តរជាតិ ថាជាគ្រឹះស្ថានធនាគារ និងហិរញ្ញវត្ថុឈានមុខគេនៅកម្ពុជា។ ដូចគ្នានេះដែរ ផ្សារទំនើប អ៉ីអនម៉ល បានក្លាយជាស្លាកសញ្ញាល្បីឈ្មោះសម្រាប់ការផ្ដល់នូវបទពិសោធនទិញអីវ៉ាន់ដែលផ្ដោតលើទំនិញមានគុណភាពខ្ពស់ និងសេវាកម្មល្អក្នុងប្រទេសកម្ពុជាតាំងពីឆ្នាំ 2014។
សម្រាប់ព័ត៌មានបន្ថែមរបស់ ABA និង AEON MALL សូមទំនាក់ទំនងមកកាន់ 023 988 100 សម្រាប់ AEON MALL ឬ 023 225 333 សម្រាប់ ABA។
អំពី AEON MALL
អ៉ីអនម៉ល គឺជាក្រុមហ៊ុនមួយ នៃអ៉ីអនគ្រុបជប៉ុន ដែលកំពុងប្រតិបត្ដិការនៅប្រទេសកម្ពុជា មានឯកទេសផ្នែកអភិវឌ្ឍន៍ និង ប្រតិបត្តិការផ្សារទំនើប ។ ដោយមានផ្សារទំនើបទី 3 គ្រោងនឹងបើកដំណើរការ នាចុងឆ្នាំ 2022 រួមនឹងការពង្រីកទំហំផ្សារទំនើបទី 1 ធ្វើអោយផ្សារទំនើបអ៉ីអនម៉ល នឹងក្លាយជាផ្សារទំនើបធំជាងគេបង្អស់ ដែលមានផ្ទៃហាងសរុប លំដាប់កំពូលទាំង 3 នៅប្រទេសកម្ពុជា ហើយអាចបំពេញតម្រូវការ និងជួយសម្រួល កម្រិតជីវភាពប្រចាំថ្ងៃ របស់អតិថិជន ជាមួយនឹងបេសកកម្មចំបងគឺ “បំពេញជីវភាពប្រចាំថ្ងៃ នៅកម្ពុជា ជាមួយនឹងលទ្ធភាពថ្មី” ។ សម្រាប់ព័ត៌មានបន្ថែម សូមចូលទៅកាន់គេហទំព័រ៖ www.aeonmallcambodia.com។
អ៉ីអនគ្រុប គឺជាក្រុមហ៊ុនមេរបស់អ៉ីអនម៉ល ហើយជាសាជីវកម្មពាណិជ្ជកម្មលក់រាយធំបំផុតមួយ នៅលើពិភពលោកដែលមានក្រុមហ៊ុនបណ្តាក់ទុនរួមគ្នាចំនួន 179 នៅក្នុងនិងក្រៅប្រទេសជប៉ុន។ អ៉ីអនគ្រុបមាន អាជីវកម្មធំៗ ចំនួន10 នៅក្នុងការអភិវឌ្ឍន៍ប្រកបដោយតុល្យភាពក្រោមរចនាសម្ព័ន្ធក្រុមហ៊ុនមេសុទ្ធសាធ។ ក្រៅពីសកម្មភាពអាជីវកម្ម អ៉ីអនគ្រុប ចូលរួមក្នុងទំនួលខុសត្រូវសង្គមរបស់ក្រុមហ៊ុន ក្នុងគោលបំណងលើកកម្ពស់សកម្មភាពសង្គមក្នុងតំបន់។ សម្រាប់ព័ត៌មានបន្ថែម សូមចូលទៅកាន់គេហទំព័រ៖ www.aeonmall.com។
