ABA និង Korea Eximbank ចាប់ដៃគ្នាជំរុញ ហិរញ្ញប្បទានពាណិជ្ជកម្មរវាងកម្ពុជា និងកូរ៉េខាងត្បូង
15/Mar/2019
14 មីនា 2019, ភ្នំពេញ, កម្ពុជា៖ ធនាគារ ABA និង ធនាគារ Export-Import Bank of Korea (Korea Eximbank) ដែលជាភ្នាក់ងារឥណទានសម្រាប់ការនាំចេញជាផ្លូវការរបស់ប្រទេសកូរ៉េខាងត្បូង នៅថ្ងៃនេះបានចុះហត្ថលេខាលើកិច្ចព្រមព្រៀងសហការគ្នារវាងធនាគារទាំងពីរ ដើម្បីផ្តល់កិច្ចធានាលើមធ្យោបាយទូទាត់លិខិតឥណទានទៅដល់អតិថិជនរបស់ពួកគេ។ ពិធីចុះហត្ថលេខាប្រព្រឹត្តទៅនៅទីស្នាក់ការកណ្តាលរបស់ធនាគារ ABA និងក្រោមអធិបតីភាពរបស់លោក Askhat Azhikhanov នាយកប្រតិបត្តិធនាគារ ABA និងលោក Sung-Soo Eun ដែលជាប្រធាន និងជានាយករបស់ធនាគារ Korea Eximbank។
ក្នុងភាពជាដៃគូនេះ អតិថិជនអាចដាក់ពាក្យស្នើលិខិតឥណទានធនាគារ ABA ដែលមានការធានាពី Korea Eximbank ដើម្បីសម្រួលដល់សកម្មភាពអាជីវកម្មរបស់ពួកគេជាមួយនឹងក្រុមហ៊ុនរបស់ប្រទេសកូរ៉េខាងត្បូង។ កិច្ចព្រមព្រៀងនេះនឹងជួយពង្រឹងនូវទំនុកចិត្ត ក៏ដូចជាភាពជឿជាក់រវាងពាណិជ្ជករកម្ពុជា និងពាណិជ្ជករប្រទេសកូរ៉េខាងត្បូង ក្នុងកិច្ចសហប្រតិបត្តិការផ្នែកជំនួញរបស់ពួកគេផងដែរ។ កិច្ចព្រមព្រៀងនេះផ្តល់ជូនលិខិតឥណទានដែលមានទំហំទឹកប្រាក់រហូតដល់ 10 លានដុល្លារ។
បញ្ចេញមតិនៅក្នុងពិធីនេះ លោក Askhat Azhikhanov បានមានប្រសាសន៍ថា “កិច្ចសហការរវាងធនាគារ ABA និង Korea Eximbank ផ្តល់នូវមធ្យោបាយយ៉ាងប្រសើរក្នុងការជំរុញសកម្មភាពអាជីវកម្មរវាងប្រទេសកម្ពុជា និងប្រទេសកូរ៉េខាងត្បូង។ ទីមួយ វាជួយផ្តល់ភាពងាយស្រួលដល់ក្រុមហ៊ុនកម្ពុជាក្នុងការទិញទំនិញពីក្រុមហ៊ុនកូរ៉េ ហើយពិសេសបំផុតគឺផ្នែកសុវត្ថិភាពតែម្តង។ ទីពីរ វាជួយយើងក្នុងការរក្សា និងអភិវឌ្ឍទំនាក់ទំនងជាមួយក្រុមហ៊ុនកូរ៉េដែលមានប្រតិបត្តិការនៅក្នុងប្រទេសកម្ពុជា។”
Korea Eximbank គឺជាស្ថាប័នដ៏ល្បីមួយ ដែលត្រូវបានបង្កើតឡើងដើម្បីជួយសម្របសម្រួលការអភិវឌ្ឍផ្នែកសេដ្ឋកិច្ចរបស់ប្រទេសកូរ៉េ និងជំរុញកិច្ចសហប្រតិបត្តិការផ្នែកសេដ្ឋកិច្ចជាមួយប្រទេសដទៃ។ សេវាចម្បងៗរបស់ធនាគាររួមមាន ហិរញ្ញប្បទានសម្រាប់ការនាំចេញ ហិរញ្ញប្បទានពាណិជ្ជកម្ម និងកម្មវិធីលិខិតធានារបស់ធនាគារ។ ធនាគារក៏ផ្តល់ឥណទានសម្រាប់ការវិនិយោគនៅក្រៅប្រទេស ឥណទានអភិវឌ្ឍន៍ធនធានធម្មជាតិ ឥណទានសម្រាប់ការនាំចូល និងសេវាកម្មផ្តល់ព័ត៌មានផ្សេងៗផងដែរ។
“ការចុះហត្ថលេខានៅថ្ងៃនេះគឺពិតជាមានសារៈសំខាន់ខ្លាំងណាស់ ព្រោះវាជាការចុះហត្ថលេខាផ្តល់មធ្យោបាយឥណទានលើកទីមួយរវាង Korea Eximbank និងស្ថាប័នហិរញ្ញវត្ថុកម្ពុជា។ កិច្ចព្រមព្រៀងផ្តល់មធ្យោបាយទូទាត់លិខិតឥណទាននេះ បង្ហាញពីបុរេសកម្មក្នុងការបង្កើនទំហំពាណិជ្ជកម្មរវាងប្រទេសទាំងពីរនាពេលអនាគត ដែលយើងនឹងអាចដឹងបានពីលទ្ធផលនៃការអភិវឌ្ឍផ្នែកសេដ្ឋកិច្ចរបស់ប្រទេសកម្ពុជា” នេះបើតាមប្រសាសន៍របស់លោក Sung-Soo Eun ជាប្រធាន និងជានាយករបស់ធនាគារ Korea Eximbank។
ចាប់ពីពេលនេះទៅ អតិថិជនរបស់ធនាគារ ABA អាចដាក់ស្នើសុំលិខិតឥណទានដែលមានការធានាពី ធនាគារ Korea Eximbank បានយ៉ាងងាយស្រួលនៅតាមសាខាណាមួយរបស់ ABA ដែលនៅជិតកន្លែងធ្វើអាជីវកម្មរបស់ពួកគេ។ ស្ថាប័នហិរញ្ញវត្ថុទាំងពីរក៏សម្តែងនូវគោលបំណងក្នុងការពង្រីកកិច្ចសហប្រតិបត្តិការដើម្បីផ្តល់មធ្យោបាយហិរញ្ញវត្ថុដទៃៗទៀតដល់អតិថិជនរបស់ពួកគេនាពេលអនាគតផងដែរ។
