កម្មវិធី​ Xero​ ភ្ជាប់​ជាមួយ​ប្រព័ន្ធ​សេវា​ធនាគារ​អន​ឡាញ​ ABA​ សម្រាប់​អាជីវកម្ម​

09/Sep/2021

Xero​ integrates​ with​ ABA IBB en

​ធនាគារ​ ABA​ ប្រកាស​ថា​ Xero​ ដែល​ជា​កម្មវិធី​គណនេយ្យ​នៅ​លើ​អ៊ីនធឺណិត​ដ៏​ពេញ​និយម​ ឥឡូវនេះ​ បាន​ភ្ជាប់​ជាមួយ​ប្រព័ន្ធ​សេវា​ធនាគារ​អន​ឡាញ​ ABA​ សម្រាប់​អាជីវកម្ម​ (IBB)​ ដែល​ជា​ផ្នែក​មួ​យ​នៃ​ការ​បន្ត​អភិវឌ្ឍន៍​បណ្តាញ​សេវា​ធនាគារ​ឌី​ជី​ថ​ល​របស់​ធនាគារ​។​

ឥឡូវនេះ​ ម្ចាស់​អាជីវកម្ម​អាច​ភ្ជាប់​គណនី​ Xero​ ជាមួយនឹង​គណនី​ក្រុមហ៊ុន​ ABA​ របស់​ខ្លួន​ និង​អនុវត្ត​នូវ​មុខងារ​កត់ត្រា​បញ្ជី​។​ ដោយសារ​ការ​ភ្ជាប់​ប្រព័ន្ធ​នេះ​ អ្នក​ប្រើប្រាស់​កម្មវិធី​ Xero​ អាច​ទទួល​បាន​នូវ​អត្ថប្រយោជន៍​ ដូច​ខាងក្រោម​៖

  • ​ទាញ​យក​ប្រតិបត្តិការ​ពី​គណនី​ក្រុមហ៊ុន​ ABA​ ចូល​ទៅ​ក្នុង​កម្មវិធី​ Xero​ ដើម្បី​ធ្វើការ​ផ្ទៀងផ្ទាត់​តាម​ពេលវេលា​ជាក់ស្តែង​។​
  • ​ចំណេញ​ពេល​ និង​កាត់​បន្ថយ​កំហុសឆ្គង​ដោយ​មិនបាច់​ត្រូវ​បញ្ចូល​ទិន្នន័យ​ដោយ​ដៃ​។​
  • ​​​​បែងចែក​ប្រតិបត្តិការ​ឥណទាន​ ឬ​ឥណ​ពន្ធ​ ជា​ចំណូល​ ឬ​ចំណាយ​ ដោយ​ស្វ័យប្រវត្តិ​។​
  • ​ទទួល​បាន​ទិន្នន័យ​ហិរញ្ញវត្ថុ​បច្ចុប្បន្នភាព​ ដោយសារ​ការ​ភ្ជាប់​ប្រព័ន្ធ​សេវា​ធនាគារ​អន​ឡាញ​សម្រាប់​អាជីវកម្ម​ (IBB)​ និង​កម្មវិធី​ Xero​ ធ្វើ​សម​កាល​កម្ម​ជា​ប្រចាំ​។​

ការ​ភ្ជាប់​ប្រព័ន្ធ​នេះ​ជួយ​ឲ្យ​អ្នក​ប្រើប្រាស់​សេវា​ធនាគារ​អន​ឡាញ​សម្រាប់​អាជីវកម្ម​ (IBB)​ ចំណេញ​ពេល​ ដោយ​ធ្វើ​ឲ្យ​ងាយស្រួល​នូវ​ការងារ​បញ្ជី​គណនេយ្យ​បញ្ចូល​ដោយ​ដៃ​ ដូច្នេះ​ពួក​គេ​មាន​ពេល​ និង​កម្លាំង​បន្ថែម​សម្រាប់​កំណើន​អាជីវកម្ម​របស់​ខ្លួន​។​

លោក​ Zokhir​ Rasulov​ នាយក​ផ្នែក​ឌី​ជី​ថ​ល​ នៃ​ធនាគារ​ ABA​ បាន​ប្រសាសន៍​ថា​៖​ “​យើង​ចាត់​ទុក​ថា​ ការ​ភ្ជាប់​សេវា​ធនាគារ​អន​ឡាញ​សម្រាប់​អាជីវកម្ម​របស់​យើង​ ជាមួយ​ Xero​ ដែល​ជា​កម្មវិធី​គណនេយ្យ​ឈានមុខ​ គឺជា​សមិទ្ធផល​ដ៏​សំខាន់​មួយ​ ក្នុង​ចំណោម​សមិទ្ធផល​ថ្មីៗ​ដែល​យើង​សម្រេច​បាន​ ក្នុង​កិច្ច​ខិតខំ​ប្រឹងប្រែង​ ដើម្បី​ធ្វើ​ឲ្យ​ការ​ប្រើប្រាស់​សេវា​ធនាគារ​ ជាមួយ​ ABA​ កាន់តែ​មាន​ភាព​ងាយស្រួល​ សម្រាប់​សហគ្រាស​ធុន​តូច​ និង​មធ្យម​ និង​បណ្ដា​ធុរកិច្ច​ថ្មី​នៅ​ក្នុង​ប្រទេស​។​ ការ​រួម​បញ្ចូល​សមត្ថភាព​រវាង​សេវា​ធនាគារ​អន​ឡាញ​សម្រាប់​អាជីវកម្ម​ និង​កម្មវិធី​ Xero​ នឹង​ជួយ​ដល់​អតិថិជន​ផ្នែក​ធុរកិច្ច​ ឲ្យ​ទទួល​បាន​បទ​ពិសោធ​ផ្នែក​ប្រតិបត្តិការ​ហិរញ្ញវត្ថុ​កាន់តែ​ប្រសើរ​ និង​ត្រួសត្រាយ​ផ្លូវ​ សម្រាប់​ប្រសិទ្ធភាព​ការងារ​ និង​កំណើន​កាន់តែ​ខ្ពស់​ថែម​ទៀត​”​។​

លោក​ក៏​បាន​បន្ថែម​ផង​ដែរ​ថា​៖​ “​តាម​រយៈ​ការ​ភ្ជាប់​បញ្ចូល​គ្នា​នេះ​ អាជីវកម្ម​ ឬ​ក្រុមហ៊ុន​នានា​ អាច​ពិនិត្យ​មើល​ប្រតិបត្តិការ​ពី​គណនី​ ABA​ របស់​ខ្លួន​នៅ​ក្នុង​កម្មវិធី​ Xero​ បាន​ដោយ​រលូន​ និង​បំពេញ​កិច្ចការ​គណនេយ្យ​របស់​ខ្លួន​បាន់​កាន់តែ​មាន​ប្រសិទ្ធភាព​”​។​

“​យើងខ្ញុំ​រីករាយ​ដែល​បាន​ចាប់​ដៃគូ​ជាមួយ​ABA​ ដែល​ជា​ធនាគារ​ឌី​ជី​ថ​ល​ឈានមុខ​គេ​មួយ​នៅ​កម្ពុជា​ ដើម្បី​ជួយ​ធ្វើ​ឲ្យ​ ជីវិត​កាន់តែ​ងាយស្រួល​សម្រាប់​សហគ្រាស​ធុន​តូច​ និង​មធ្យម​នៅ​កម្ពុជា​ និង​ភ្ជាប់​ពួក​គេ​ទៅ​នឹង​ដំណោះស្រាយ​ដែល​ពួក​គេ​ត្រូវការ​សម្រាប់​ការ​រីក​ចម្រើន​។​ ជាមួយនឹង​ការ​សហការ​ណ៌​នេះ​ យើង​នឹង​បន្ត​ជួយ​ឲ្យ​អាជីវកម្ម​ខ្នាត​តូច​ដំណើរការ​កាន់តែ​រលូន​ជាមួយនឹង​ការ​ត្រួតពិនិត្យ​ ដែល​មាន​តម្លាភាព​លើ​ការ​គ្រប់គ្រង​លំហូរ​សាច់ប្រាក់​របស់​ពួក​គេ​”​។​ បើ​តាម​ ប្រសាសន៍​របស់​លោក​ Kevin​ Fitzgerald​ នាយក​គ្រប់គ្រង​ Xero​ ប្រចាំ​តំបន់​អាស៊ី​។​

ដើម្បី​ដឹង​បន្ថែម​ សូម​ចូល​ទៅ​កាន់​ទំព័រ​ ​​ភ្ជាប់​ប្រព័ន្ធ​គណនេយ្យ​​ Xero​ នៅ​លើ​វិ​ប​សាយ​របស់​ធនាគារ​យើងខ្ញុំ​។​

​​​ប្រសិនបើ​អ្នក​មិន​ទាន់​ប្រើ​សេវា​ធនាគារ​អន​ឡាញ​ ABA​ សម្រាប់​អាជីវកម្ម​របស់​អ្នក​ និង​ចង់​ដឹង​បន្ថែម​អំពី​ផលិតផល​នេះ​ សូម​ទាក់ទង​ក្រុមការងារ IBB​ របស់​យើងខ្ញុំ​តាម​អ៉ីមែ៉ល​​ [email protected]remove-this.ababank.com ឬទូរស័ព្ទ​មក​ផ្នែក​ទំនាក់ទំនង​អតិថិជន​របស់​យើងខ្ញុំ​តាម​លេខ​ 023​ 925​ 333​