សេចក្ដីបំភ្លឺជុំវិញការចោទប្រកាន់ពាក់ព័ន្ធ នឹងក្រដាសប្រាក់ដែលមិនអាចប្រើប្រាស់បាន
25/Jan/2019
ថ្មីៗនេះ ធនាគារ ABA បានសង្កេតឃើញថា មានអតិថិជនមួយចំនួនបង្ហោះសារនៅក្នុងបណ្ដាញសង្គម ដោយអះអាងថាពួកគាត់បានដកប្រាក់ពីម៉ាស៊ីន ATM និងបញ្ជររបស់ ABA នៅតាមទីតាំងផ្សេងៗគ្នាទូទាំងប្រទេស ហើយឃើញនៅលើក្រដាសប្រាក់ផ្នែកខាងមុខមានពាក្យ “COPY” ឬជាពាក្យខ្មែរថា “លុយសែន” ឬ “ក្រដាសសែន” (ដែលយើងខ្ញុំ ហៅថា “ក្រដាសប្រាក់ដែលមិនអាចប្រើប្រាស់បាន”)។
ពាក់ព័ន្ធនឹងបញ្ហានេះ ធនាគារយើងខ្ញុំសូមជម្រាបថា គ្រប់ករណីដែលអតិថិជនបានលើកឡើង ត្រូវបានកត់ត្រាយ៉ាងត្រឹមត្រូវ និងធ្វើការស៊ើបអង្កេតយ៉ាងហ្មត់ចត់បំផុត។ លទ្ធផលស៊ើបអង្កេតបានបង្ហាញឲ្យឃើញថា គ្មានសន្លឹកណាមួយនៃក្រដាសប្រាក់ដែលពួកគាត់អះអាង គឺជាក្រដាសប្រាក់ដែលចេញពីម៉ាស៊ីន ATM ឬបញ្ជររបស់ធនាគារយើងខ្ញុំឡើយ។ ផ្ទុយទៅវិញ ធនាគារយើងខ្ញុំ បានផ្ដល់ភ័ស្តុតាងយ៉ាងច្បាស់លាស់ថា ក្រដាសប្រាក់ដែលបានដកចេញពីម៉ាស៊ីន ATM និងក្រដាសប្រាក់ដែលបេឡាប្រគល់ជូនអតិថិជនគឺជាក្រដាសប្រាក់ពិត។ បន្ថែមលើនេះទៀត យើងខ្ញុំបានកត់សម្គាល់ឃើញថា បញ្ហាទាំងអស់ដែលពួកគាត់បានចោទប្រកាន់ មិនត្រូវបានធ្វើឡើងក្រោយពីដកប្រាក់ចេញពី ATM ឬពេលទទួលប្រាក់ពីបញ្ជររបស់ធនាគារភ្លាមៗឡើយ ពោលគឺពួកគាត់បានលើកបញ្ហាទាំងនោះឡើង ក្នុងរយៈពេលក្រោយមកទៀត (ករណីខ្លះ កន្លងផុតយូររហូតដល់៥ថ្ងៃឯណោះ)។ យោងតាមហេតុផលនេះ យើងអាចសន្និដ្ឋានបានថា ក្រដាសប្រាក់ពិតប្រាកដត្រូវបានគេលួចដូរជំនួសដោយក្រដាសប្រាក់ដែលមិនអាចប្រើប្រាស់បាន នៅក្នុងពេលណាមួយ ក្រោយពីពួកគាត់បានចាកចេញពីកន្លែងម៉ាស៊ីនដកប្រាក់ ឬបញ្ជរធនាគារ។ លទ្ធផលនៃការស៊ើបអង្កេតផ្ទៃក្នុងត្រូវបានជម្រាបជូនដល់អតិថិជនតាមរយៈទូរស័ព្ទ ឬបង្ហាញភ័ស្តុតាងជូនក្នុងពេលដែលពួកគាត់អញ្ជើញមកជួបជាមួយក្រុមជំនាញការរបស់ធនាគារ។
យើងខ្ញុំ សូមស្រាយបំភ្លឺជូនសាធារណជនឲ្យបានជ្រាបថា ធនាគារ ABA មាន នីតិវិធីប្រតិបត្តិការសាច់ប្រាក់ ដែលអនុវត្តយ៉ាងតឹងរឹងបំផុត ជាមួយបច្ចេកវិទ្យាទំនើបចុងក្រោយ ដើម្បីទប់ស្កាត់ការលួចបន្លំរបស់មនុស្ស និងការពារមិនឲ្យបុគ្គលិករបស់ធនាគារបន្លំប្ដូរក្រដាសប្រាក់ទាំងនោះបានឡើយ។ នីតិវិធីនេះ អាចធានាបានថាមានតែក្រដាសប្រាក់ពិតតែប៉ុណ្ណោះ ត្រូវបានដាក់ចូលក្នុងម៉ាស៊ីន ATM របស់ ABA ដោយប្រើប្រាស់ការត្រួតពិនិត្យតាមដានជាច្រើនដំណាក់កាលដូចខាងក្រោម៖
- គ្រប់ក្រដាសប្រាក់ដែលចូលមកធនាគារ ABA ត្រូវបានត្រួតពិនិត្យ ដោយម៉ាស៊ីនរាប់ប្រាក់គុណភាពខ្ពស់បំផុត ដែលអាចរកឃើញ ឬដឹងភ្លាមៗប្រសិនបើមានក្រដាសប្រាក់ដែលមិនអាចប្រើប្រាស់បាន។ ក្នុងពេលរាប់និងរៀបប្រាក់ ម៉ាស៊ីននេះធ្វើការថតលេខមាលា (serial number) របស់ក្រដាសប្រាក់នីមួយៗ ហើយរក្សាលេខនោះទុកក្នុងទិន្នន័យរបស់ធនាគារយ៉ាងច្បាស់លាស់។
- រាល់ប្រតិបត្តិការរៀបចំសាច់ប្រាក់ ត្រូវបានធ្វើឡើងនៅក្នុងបន្ទប់ពិសេសមួយ ដែលស្ថិតក្រោមការត្រួតពិនិត្យយ៉ាងហ្មត់ចត់ពីថ្នាក់គ្រប់គ្រងនៃនាយកដ្ឋានផ្សេងៗគ្នា ជាមួយការតាមដានយ៉ាងដិតដល់ពីនាយកដ្ឋានសន្តិសុខតាមកាមេរ៉ាសុវត្ថិភាព (CCTV)។
- ដំណើរការនៃការដឹកជញ្ជូនប្រាក់ទៅដាក់នៅម៉ាស៊ីន ATM ត្រូវបានត្រួតពិនិត្យជាប់ជានិច្ចពីតំណាងក្រុមការងារសន្តិសុខ និងនាយកដ្ឋានផ្សេងៗ។ មុនដឹកចេញ ប្រអប់ដាក់ប្រាក់ត្រូវបានចាក់សោជាប់រួចជាស្រេចនៅក្នុងបន្ទប់រៀបចំ ហើយបុគ្គលិកដឹកជញ្ជូនមិនអាចប្រើមធ្យោបាយណាមួយដើម្បីបើកប្រអប់ប្រាក់នេះបានឡើយ មិនថានៅតាមផ្លូវ ឬនៅកន្លែងម៉ាស៊ីន ATM។
- ម៉ាស៊ីន ATM របស់ ABA មានបច្ចេកវិទ្យាពិសេស NCR Secure™ ត្រូវបានបង្កើតឡើងដោយមានស្រទាប់ការពារច្រើនដើម្បីបង្ការមិនឲ្យមានការលួចបើកប្រអប់ប្រាក់ ATM ទោះប្រើមធ្យោបាយណាក៏ដោយ។សុវត្ថិភាព ATM របស់យើងទទួលបានវិញ្ញាបនបត្រទទួលស្គាល់ពីគណៈកម្មាធិការអឺរ៉ុបសម្រាប់បទដ្ឋានីយកម្ម (CEN) ដែលផ្ដល់នូវបែបផែនស្ដង់ដាររបស់អង្គភាពបទដ្ឋានីយកម្មជាតិនៃប្រទេសអឺរ៉ុបទាំង33ប្រទេសហើយត្រូវបានធ្វើតេស្ដយ៉ាងហ្មត់ចត់បំផុតដើម្បីរក្សាស្ដង់នេះឲ្យបាន។
- ធនាគារបានធ្វើសវនកម្មផ្ទៃក្នុង និងសវនកម្មពីភាគីទីបីជាទៀងទាត់ ដែលធានាបានថាយើងមានប្រព័ន្ទផ្ទៀងផ្ទាត់ និងតាមដានប្រសិទ្ធភាពផ្ទៃក្នុងដែលកំពុងមានដំណើរការយ៉ាងត្រឹមត្រូវ។
ផ្អែកលើកត្តាទាំងនេះ និងលទ្ធផលនៃការស៊ើបអង្កេតផ្ទៃក្នុង យើងខ្ញុំសូមធ្វើការបដិសេធទាំងស្រុង ចំពោះការចោទប្រកាន់ទាំងឡាយនៅក្នុងបណ្ដាញសង្គម ដែលថាម៉ាស៊ីន ATM ឬបញ្ជរធនាគារ ABA បញ្ចេញក្រដាសប្រាក់ដែលមិនអាចប្រើប្រាស់បាន ហើយយើងខ្ញុំសូមរក្សាសិទ្ធិក្នុងការបញ្ជូនករណីចោទប្រកាន់នេះទៅឲ្យអាជ្ញាធរមានសមត្ថកិច្ច ដើម្បីចាត់វិធានការ និងដោះស្រាយតាមផ្លូវច្បាប់។
ធនាគារ ABA សូមអំពាវនាវយ៉ាងទទូចឲ្យអតិថិជន មេត្តារាប់ និងពិនិត្យប្រាក់ឲ្យបានត្រឹមត្រូវភ្លាមៗ មុនចាកចេញពីម៉ាស៊ីន ATM ឬបញ្ជរធនាគាររបស់យើងខ្ញុំ ព្រោះថារាល់បញ្ហាដែលកើតមានឡើងក្រោយអតិថិជនចាកចេញហើយ យើងខ្ញុំមិនទទួលខុសត្រូវឡើយ។
