ABA សហការជាមួយធនាគារ សហគ្រាសធុនតូច និងមធ្យម ដើម្បីគាំទ្រគម្រោងហិរញ្ញប្បទានស្ដារវិស័យទេសចរណ៍ឡើងវិញ ជាមួយទឹកប្រាក់កម្ចីរហូតដល់ 20 លានដុល្លារអាមេរិក
01/Jul/2022
ធនាគារ ABA ដែលជាធនាគារពាណិជ្ជកម្ពុជាធំជាងគេ1 បានសហការជាមួយធនាគារ សហគ្រាសធុនតូច និងមធ្យម ដើម្បីផ្ដល់ជំនួយហិរញ្ញប្បទានរហូតដល់ 20,000,000 ដុល្លារអាមេរិក ដើម្បីគាំទ្រអាជីវកម្មក្នុងវិស័យទេសចរណ៍ ដែលរងផលប៉ះពាល់ក្នុងអំឡុងជំងឺរាតត្បាតកូវីដ 19 ក្រោមគម្រោងសហហិរញ្ញប្បទានស្ដារវិស័យទេសចរណ៍ ឡើងវិញ (TRCS)។
ក្រោមគម្រោងកម្ចីនេះ ABA អាចផ្តល់កម្ចីសមរម្យជូនអាជីវកម្មក្នុងវិស័យទេសចរណ៍ជាមួយនឹងប្រាក់កម្ចីរហូតដល់ 400,000 ដុល្លារអាមេរិក រួមជាមួយអត្រាការប្រាក់ពិសេស 6.5% ក្នុងមួយឆ្នាំ និងរយៈពេលរហូតដល់ 7 ឆ្នាំ។
គួរបញ្ជាក់ផងដែរថា រដ្ឋាភិបាលបានដាក់ដំណើរការ គម្រោងសហហិរញ្ញប្បទានស្ដារវិស័យទេសចរណ៍ឡើងវិញ តាមរយៈធនាគារ សហគ្រាសធុនតូច និងមធ្យម ដោយមានការគាំទ្រពីគ្រឹះស្ថានហិរញ្ញវត្ថុចំនួន 19 ដើម្បីជំរុញការងើបឡើងវិញនៃវិស័យទេសចរណ៍ បន្ទាប់ពីជំងឺរាតត្បាតកូវីដ 19។ កិច្ចខិតខំប្រឹងប្រែងរួមគ្នានេះផ្តោតជាសំខាន់លើអាជីវកម្មពាក់ព័ន្ធនឹងវិស័យទេសចរណ៍ ដែលប្រតិបត្តិការ ឬអាជីវកម្ម ត្រូវបានបិទ ឬផ្អាកដំណើរការដោយសារឥទ្ធិពលនៃជំងឺរាតត្បាតកូវីដ 19។
លោក Bibhu Pandey នាយកឥណទាន ABA មានមតិចំពោះការចូលរួមរបស់ធនាគារ ABA ក្នុងគម្រោងនេះថា៖ "គម្រោងសហហិរញ្ញប្បទានស្តារវិស័យទេសចរណ៍ឡើងវិញ នឹងរួមចំណែកយ៉ាងសំខាន់ក្នុងការស្តារសេដ្ឋកិច្ចកម្ពុជា ព្រោះថាឧស្សាហកម្មទេសចរណ៍តែងតែដើរតួនាទីយ៉ាងសំខាន់ជានិច្ចក្នុងការអភិវឌ្ឍរបស់ប្រទេស។
លោកបានបន្ថែមថា៖ "យើងខ្ញុំជឿជាក់ថា គម្រោងហិរញ្ញប្បទាននេះ នឹងអនុញ្ញាតឲ្យ ABA ផ្តល់កម្ចី សម្រាប់អាជីវកម្មនានា ដូចជា សណ្ឋាគារ ផ្ទះសំណាក់ ភោជនីយដ្ឋាន និងអាជីវកម្មផ្សេងទៀត ដែលគាំទ្រដល់ឧស្សាហកម្មទេសចរណ៍ ដើម្បីដំណើរការអាជីវកម្មរបស់ពួកគាត់ឡើងវិញ" ។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល និងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។
