ABA ក្លាយជា "ធនាគារបម្រើសេវារូបវន្តបុគ្គលដ៏ឆ្នើមនៅកម្ពុជា ប្រចាំឆ្នាំ 2022" ពីទស្សនាវដ្ដី Asian Banking and Finance
22/Aug/2022
ធនាគារ ABA ដែលជាធនាគារពាណិជ្ជលេខមួយនៅកម្ពុជា1 ទទួលបានពានរង្វាន់ "ធនាគារបម្រើសេវារូបវន្ដបុគ្គលប្រចាំឆ្នាំដ៏ឆ្នើមនៅកម្ពុជា" មួយទៀត ដែលជាពានរង្វាន់មួយនៃ Retail Banking Awards 2022 របស់ទស្សនាវដ្តី Asian Banking and Finance។
ពានរង្វាន់នេះ សាទរ ABA ចំពោះសមិទ្ធផលដ៏ល្អប្រសើរពេញមួយឆ្នាំ និងការអភិវឌ្ឍនៃផ្លែតហ្វម និង សេវាធនាគារឌីជីថល ដើម្បីនាំយកដំណោះស្រាយសេវាធនាគារងាយស្រួល និងប្រកបដោយនវានុវត្ត ជូនអតិថិជនរបស់ខ្លួន។ ការសម្រេចចិត្តរបស់គណៈវិនិច្ឆ័យ Asian Banking and Finance ផ្អែកលើកាអភិវឌ្ឍ និងការពង្រឹងសមត្ថភាព ថ្មីៗគួរឲ្យកត់សម្គាល់ នៃកម្មវិធីធនាគារលើទូរស័ព្ទ ABA Mobile របស់ខ្លួន ដូចជា៖
- ការណែនាំមុខងារបើកគណនីរហ័ស ដែលអតិថិជនមិនទាន់មានគណនី ABA អាចបើកគណនី ដំបូងរបស់ខ្លួន តាមទូរស័ព្ទស្មាតហ្វូន ដោយមានតែអត្តសញ្ញាណប័ណ្ណ មានសុពលភាពប៉ុណ្ណោះ (តាមរយៈ ដំណើរការស្គាល់អតិថិជនតាមអេឡិកត្រូនិក (e-KYC) ដ៏មានសុវត្ថិភាព);
- ការអភិវឌ្ឍមុខងារ ABA QR ជាមួយការគាំទ្រពីស្ដង់ដារ KHQR ថ្នាក់ជាតិ ដែលអនុញ្ញាត ឲ្យអតិថិជន ប្រមូលប្រាក់ទូទាត់ ឬទទួលប្រាក់ផ្ទេរពីគ្រប់អ្នកប្រើ ABA Mobile ក៏ដូចជាអតិថិជន ធនាគារផ្សេង ដែលដំណើរការជាមួយស្ដង់ដារ KHQR របស់ធនាគារជាតិនៃកម្ពុជា;
- ការដាក់ឲ្យប្រើប្រាស់មុខងារផ្ទេរប្រាក់ ពីកាតទៅកាតភ្លាមៗ ជាមួយកាត Mastercard និង UnionPay ដែលម្ចាស់កាតអាចផ្ញើប្រាក់រហូតដល់ 20,000 ដុល្លារក្នុងមួយខែ ពីគណនីរបស់ខ្លួន តាម ABA Mobile។
ទំនើបកម្មគួរឲ្យកត់សម្គាល់មួយទៀតរបស់ ABA គឹការចាប់ផ្ដើមទទួលទូទាត់ពន្ធជូនអគ្គនាយកដ្ឋាន ពន្ធដារ (GDT)។ អតិថិជន ABA អាចបង់ពន្ធតាម ABA Mobile, តាមវិបសាយ និងកម្មវិធីទូរស័ព្ទអគ្គនាយកដ្ឋានពន្ធដារ, និងតាមបណ្ដាសាខាធនាគារ ABA។ ជាមួយសេវាឥតគិតថ្លៃ អតិថិជន ABA ឥឡូវ អាចបំពេញកាតព្វកិច្ចបង់ពន្ធ បានយ៉ាងងាយស្រួល។
កាលពីខែធ្នូ ភ្នាក់ងារវាយតម្លៃ S&P បានបញ្ជាក់ជាថ្មីអំពីចំណាត់ថ្នាក់ឥណទានរបស់ធនាគារ ABA នៅកម្រិត 'B+' ជាមួយអនាគត ស្ថិរភាព។ ចំណាត់ថ្នាក់នេះ ឆ្លុះបញ្ចាំងពីទស្សនៈរបស់ S&P ដែលថា ធនាគារអាចគ្រប់គ្រងប្រកបដោយចីរភាពនូវកំណើនយ៉ាងឆាប់រហ័សនៃប្រាក់កម្ចី និងប្រាក់បញ្ញើ ទោះបីជាមានការរីករាលដាលនៃវីរុសកូវីដ-19 ក៏ដោយ។ អ្នកជំនាញក៏បានកត់សម្គាល់ផងដែរថា ផ្លែតហ្វមឌីជីថលរបស់ ABA គឺជាឧត្តមភាពប្រកួតប្រជែង ដែលជាកត្តានៃការពង្រីកប្រាក់កម្ចី និងប្រាក់បញ្ញើ។
ការពង្រីកបណ្ដាញស្វ័យសេវា ABA ជាបន្ដបន្ទាប់ ក៏រួមចំណែកដល់សេចក្ដីសម្រេចចិត្តរបស់គណៈវិនិច្ឆ័យ ផងដែរ ដោយទីតាំងចំនួន 11 បន្ថែមទៀត ត្រូវបានបើកក្នុងទីក្រុងសំខាន់ៗ។ ទីតាំងទាំង នេះ បំពាក់ដោយ ម៉ាស៊ីនដក/ដាក់ប្រាក់ ម៉ាស៊ីនដាក់មូលប្បទានបត្រ និងម៉ាស៊ីនបើកកាតជាដើម។ ធនាគារក៏បាន បន្ថែម សាខាបម្រើសេវាធនាគារពេញលេញចំនួន 2 បន្ថែមនៅខេត្តមណ្ឌលគិរី និងខេត្តប៉ៃលិន ទៅក្នុងបណ្ដាញ រូបវន្ដរបស់ខ្លួនផងដែរ។
មានមតិក្នុងឱកាសនេះ លោក Askhat Azhikhanov នាយកប្រតិបត្តិធនាគារ ABA មានប្រសាសន៍ថា៖ "នេះជាពានរង្វាន់ពីរឆ្នាំជាប់គ្នាពីទស្សនវដ្ដី Asian Banking and Finance ដែលបញ្ជាក់ ពីការប្ដេជ្ញា ចិត្តរបស់យើងខ្ញុំ ក្នុងការនាំយកនូវដំណោះស្រាយហិរញ្ញវត្ថុប្រកបដោយនវានុវត្ត និងអត្ថប្រយោជន៍ ជូនដល់អតិថិជន។ ដូចសព្វដង យើងខ្ញុំសូមចែករំលែកកិត្តិនាមនេះជូនដល់អតិថិជនទាំងអស់ និងសូម ថ្លែងអំណរគុណសម្រាប់ការបន្តគាំទ្រ។"
លោក Tim Charlton និពន្ធនាយករបស់ទស្សនាវដ្តីនេះ បានមានប្រសាសន៍ថា៖ "សមិទ្ធផល ធនាគារ ABA បានបញ្ជាក់ជាថ្មីម្ដងទៀត ពីសមត្ថភាពឈានមុខ ដោយខ្លួនធ្វើការបង្កើនអានុភាពបច្ចេកវិទ្យា ដើម្បីកែលម្អប្រតិបត្តិការផ្ទៃក្នុង ក៏ដូចជាពង្រីកសេវាកម្មកាន់តែងាយស្រួល ជូនអតិថិជនជាច្រើន ដូចជាសេវាផ្ទេរប្រាក់, ការទូទាត់, ការដាក់ប្រាក់ និងសេវាផ្សេងៗទៀតក្នុងកម្មវិធី ABA Mobile។ កត្តាទាំងនេះបានជួយឲ្យកំណើនអតិថិជន ABA Mobile កើនដល់ 78% ហើយនៅតែរក្សាតំណែង ជាធនាគារមានប្រាក់ចំណេញខ្ពស់បំផុតប្រចាំប្រទេស។"
លោកបានបន្ថែមថា៖ "យើងខ្ញុំពិតជាមានមោទនភាពដែលបានប្រគល់ពានរង្វាន់ ធនាគាររូបវន្ដបុគ្គលដ៏ឆ្នើមប្រចាំឆ្នាំនៅកម្ពុជា ជូនធនាគារ ABA ក្នុងកម្មវិធី Asian Retail Banking Awards 2022 ដោយសារគំនិតផ្ដួចផ្ដើមនានារបស់ ABA បានធ្វើឲ្យធនាគារនេះកាន់តែរីកចម្រើន និងចាក់គ្រឹះដ៏រឹងមាំក្នុង ទីផ្សារក្នុងនាម ជាធនាគារធំបំផុតនៅកម្ពុជា។"
អំពីទស្សនាវដ្តី Asian Banking and Finance
ពានរង្វាន់ ABF Retail Banking ត្រូវបានរៀបចំឡើងដោយទស្សនាវដ្តី Asian Banking & Finance។ ទស្សនាវដ្តី Asian Banking & Finance ជាទស្សនាវដ្តីឧស្សាហកម្មបម្រើឲ្យឧស្សាហកម្មសេវាហិរញ្ញវត្ថុថាមវន្តរបស់អាស៊ី។ ច្បាប់បោះពុម្ពផ្សាយនីមួយៗមានអត្ថបទផ្សេងៗលាយគ្នាដែលទាក់ទាញនាយកកម្រិតប្រតិបត្តិនៃស្ថាប័នសេវាធនាគារនិងហិរញ្ញវត្ថុធំៗនៅអាស៊ី។ ទស្សនាវដ្តី Asian Banking and Finance បោះពុម្ពផ្សាយរាល់ត្រីមាស និងចែកចាយជូនគណៈគ្រប់គ្រងជាន់ខ្ពស់នៅតាមស្ថាប័នសេវាហិរញ្ញវត្ថុអាស៊ី តាមរយៈការផ្ញើមែលផ្ទាល់ និងច្បាប់បោះពុម្ពផ្សាយជាសំណុំទៅកាន់ការិយាល័យកណ្តាលនានា។ សម្រាប់ព័ត៌មានបន្ថែម សូមចូលទៅកាន់គេហទំព័រ៖ asianbankingandfinance.net ។
1 ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, កម្ចីដុល, ប្រាក់បញ្ញើអតិថិជន និងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 របស់ធនាគារជាតិនៃកម្ពុជា។