ធនាគារ ABA ចូលរួមក្នុង ទិវាប្រាក់រៀល ឆ្នាំ 2024 ដើម្បីលើកកម្ពស់ការប្រើប្រាស់ប្រាក់រៀល
25/Mar/2024
ធនាគារ ABA មានមោទនភាពដែលបានចូលរួមក្នុង ទិវាប្រាក់រៀលឆ្នាំ 2024 ដែលបានប្រព្រឹត្តទៅកាលពីថ្ងៃទី 24 ខែមីនា ឆ្នាំ 2024 នៅផ្សារទំនើប ខេម៉លភ្នំពេញ។ កម្មវិធីនេះ បានប្រារព្ធឡើងដើម្បីអបអរខួបលើកទី 44 នៃការដាក់ឱ្យចរាចរប្រាក់រៀលជារូបិយប័ណ្ណផ្លូវការរបស់កម្ពុជាឡើងវិញ។
កម្មវិធីនេះ រៀបចំឡើងក្នុងគោលបំណងលើកកម្ពស់ការយល់ដឹងរបស់សាធារណជនអំពីប្រវត្តិ និងសារៈសំខាន់នៃប្រាក់រៀល ព្រមទាំងតួនាទីរបស់រូបិយប័ណ្ណជាតិចំពោះសេដ្ឋកិច្ចកម្ពុជាដែលបន្ដរីកចម្រើនទៅមុខ។ គួររំលឹកផងដែរថា ធនាគារ ABA បានដើរតួយ៉ាងសកម្មនៅក្នុងការបង្ហាញពីអត្ថប្រយោជន៍នានានៃការប្រើប្រាស់ប្រាក់រៀល និងការលើកកម្ពស់បរិយាបន្នហិរញ្ញវត្ថុ។
នៅក្នុង ទិវាប្រាក់រៀលឆ្នាំ 2024 ក៏មានការដាក់តាំងបង្ហាញបញ្ជរជាច្រើនផងដែរ។ អ្នកចូលរួមបានរីករាយជាមួយនឹងការដាក់បង្ហាញអំពីប្រវត្តិ និងការវិវត្តន៍របស់ប្រាក់រៀល រួមទាំងការប្រគុំតន្ត្រីពីតារាចម្រៀងល្បីៗ វគ្គសំណួរ-ចម្លើយ និងការបង្ហាញវីដេអូទាក់ទងនឹងប្រាក់រៀល និងទិដ្ឋភាពសេដ្ឋកិច្ចរបស់កម្ពុជា។
ក្នុងរយៈពេលពេញមួយថ្ងៃនោះ ABA បានចូលរួមយ៉ាងសកម្មជាមួយអ្នកចូលរួមទាំងអស់ ដោយបង្ហាញពីការប្តេជ្ញាចិត្តរបស់ខ្លួនចំពោះការលើកកម្ពស់បរិយាបន្នហិរញ្ញវត្ថុ និងការគាំទ្រប្រាក់រៀល។ ក្រុមការងារ ABA បានផ្តល់ព័ត៌មានអំពីផលិតផល និងសេវាកម្មដែល ABA មានផ្ដល់ជូន ជាប្រាក់រៀល ដូចជាគណនីសន្សំ និងគណនីកាលកំណត់មានការប្រាក់ខ្ពស់ជាដើម។ អ្នកចូលរួម អាចបើកគណនីរហ័ស ABA នៅបញ្ជរផ្ទាល់ ដោយទទួលបានគណនីជាប្រាក់រៀល និងអាចប្រើប្រាស់បានភ្លាមៗ។
ជាមួយការប្តេជ្ញាចិត្តជាបន្តបន្ទាប់របស់ ABA ក្នុងការលើកកម្ពស់ការប្រើប្រាស់ប្រាក់រៀល ម៉ាស៊ីនអេធីអឹម ម៉ាស៊ីនដាក់ប្រាក់ និងម៉ាស៊ីនដកដាក់ប្រាក់ គឺសុទ្ធតែទទួលយក និងចែកចាយក្រដាសប្រាក់រៀល ដែលមានក្រដាសប្រាក់ផ្សេងៗគ្នា។ ការណ៍នេះ ធានានូវភាពងាយស្រួលជូនអតិថិជន សម្រាប់តម្រូវការសន្សំ ដកប្រាក់ និងគ្រប់គ្រងហិរញ្ញវត្ថុរបស់ពួកគាត់ជាប្រាក់រៀល។
