ធនាគារ ABA គាំទ្រកម្មវិធីពន្លឿនអាជីវកម្មថ្នាលឌីជីថលរដូវកាលទី 2 ដើម្បីជំរុញកំណើនសហគ្រាសធុនតូច និងមធ្យម នៅកម្ពុជា
23/Mar/2023
ធនាគារ ABA ដែលជាធនាគារពាណិជ្ជឈានមុខមួយនៅកម្ពុជា បានក្លាយជា Platinum Sponsor នៃកម្មវិធីពន្លឿនអាជីវកម្មថ្នាលឌីជីថលរដូវកាលទី 2 (DPA)។
DPA គឺជាកម្មវិធីពន្លឿនអាជីវកម្មមួយ ដែលមានរយៈពេល 16 សប្ដាហ៍ និងត្រូវបានរៀបចំឡើង ដើម្បីគាំទ្រធុរកិច្ចឌីជីថលថ្មីៗដែលអាចផ្ដល់នូវថ្នាលឌីជីថលប្រកបដោយនវានុវត្តន៍ (ការអនុវត្តបែបថ្មី) សម្រាប់សហគ្រាសធុនមីក្រូ តូច និងមធ្យម (MSMEs) ហើយចាប់ផ្ដើមអនុវត្តធុរកិច្ចបែបឌីជីថល ទៅក្នុងប្រតិបត្តិការអាជីវកម្មរបស់ពួកគេ។
ពិធីសម្ពោធបើកដំណើរការនៃ កម្មវិធីពន្លឿនអាជីវកម្មថ្នាលឌីជីថលរដូវទី 2 បានប្រព្រឹត្តទៅកាលពីថ្ងៃទី 21 ខែមីនា ឆ្នាំ 2023 នៅការិយាល័យនៃមជ្ឈមណ្ឌលបណ្ដុះធុរកិច្ចថ្មី “តេជោ” ក្រោមអធិបតីភាព ឯកឧត្តមបណ្ឌិត តាំង ងួនលី នាយកប្រតិបត្តិនៃ មជ្ឈមណ្ឌលបណ្ដុះធុរកិច្ចថ្មី “តេជោ” និងភ្ញៀវកិត្តិយសជាច្រើនរូបទៀត។
នៅក្នុងពិធីសម្ពោធនោះផ្ទាល់ លោកស្រី ធាម រមណីយ នាយិកាទំនាក់ទំនងគូភាគី - ប្រធានគ្រប់គ្រងតំបន់ ABA បានបង្ហាញអំពីការប្ដេជ្ញាចិត្តរបស់ធនាគារ ក្នុងការគាំទ្រនវានុវត្តន៍ និងសហគ្រិនភាពនៅក្នុងប្រទេស។
លោកស្រីមានប្រសាសន៍ថា “ក្នុងនាមជាអ្នកគាំទ្រនវានុវត្តន៍ និងសហគ្រិនភាព ធនាគារ ABA មើលឃើញនូវសារៈសំខាន់នៃគំនិតផ្ដួចផ្ដើមនានា ជាក់ស្ដែងដូច កម្មវិធីពន្លឿនអាជីវកម្មថ្នាលឌីជីថល ជាដើម ដែលធ្វើឡើងដើម្បីផ្តល់ឱកាសដល់នវានុវត្តជន និងម្ចាស់ធុរកិច្ចថ្មីទាំងអស់។ កម្មវិធីពន្លឿនអាជីវកម្មថ្នាលឌីជីថលនេះ មានគោលបំណងគាំទ្រដល់អាជីវកម្ម ក្នុងការដោះស្រាយបញ្ហាប្រឈម និងតម្រូវការរបស់ MSMEs ដោយអនុវត្តតាមគំនិតអាជីវកម្ម ប្រកបដោយនវានុវត្តន៍ និងភាពច្នៃប្រឌិត” ។
លោកស្រីបានបន្ដថា “យើងខ្ញុំជឿជាក់ថា កម្មវិធីនេះពិតជាអាចជួយដល់អាជីវកម្មក្នុងស្រុក និងសហគ្រាសធុនតូច និងមធ្យមនៅកម្ពុជា ឲ្យចាប់ផ្តើមអនុវត្តដំណើរធុរកិច្ចបែបឌីជីថល និងការរួមចំណែកដល់កំណើនសេដ្ឋកិច្ចរបស់ប្រទេស។ យើងខ្ញុំមានសេចក្តីសោមនស្ស ដែលបានចូលរួមជាផ្នែកមួយនៃគំនិតផ្តួចផ្តើមនេះ ក្នុងការគាំទ្រដល់ធុរកិច្ចថ្មី ដែលយើងខ្ញុំជឿជាក់ថា នឹងផ្ដល់ផលវិជ្ជមានដ៏ចាំបាច់ដល់សហគមន៍”។
តាមរយៈការគាំទ្រកម្មវិធីពន្លឿនអាជីវកម្មថ្នាលឌីជីថល ធនាគារ ABA បានជួយជំរុញប្រព័ន្ធអេកូធុរកិច្ចថ្មី នៅក្នុងប្រទេស ដែលនឹងក្លាយជាកម្លាំងចលករមិនអាចប្រកែកបាន នៅក្នុងកំណើនសេដ្ឋកិច្ច និងនវានុវត្តន៍។
