ABA ឧបត្ថម្ភសន្និបាតប្រចាំឆ្នាំ 2024 និងកម្មវិធីជប់លៀងសប្បុរសធម៌របស់ AmCham

ធនាគារ ABA បានធ្វើជាអ្នកឧបត្ថម្ភធំ (Gold Sponsor) នៃមហាសន្និបាតប្រចាំឆ្នាំ 2024 និងកម្មវិធីជប់លៀងសប្បុរសធម៌របស់ សភាពាណិជ្ជកម្មអាមេរិក (AmCham) ដែលបានប្រព្រឹត្តទៅកាលពីថ្ងៃទី 27 ខែមីនា ឆ្នាំ 2024 នៅរាជធានីភ្នំពេញ។

ពិធីនេះបានប្រព្រឹត្តទៅដោយមានវត្តមានរបស់ ឯកឧត្តម លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រួមជាមួយនឹងមន្ត្រីរដ្ឋាភិបាលជាន់ខ្ពស់ដទៃទៀត។ មហាសន្និបាតប្រចាំឆ្នាំ 2024 របស់ AmCham ធ្វើឡើងក្នុងគោលបំណងអបអរដល់សមិទ្ធផលរបស់ខ្លួនក្នុងឆ្នាំ 2023 និងប្រកាសសមាសភាពក្រុមប្រឹក្សាភិបាលថ្មីផងដែរ

ដំណើរនៃការជ្រើសរើសសមាសភាពនេះ នាយកផ្នែកហានិភ័យនៃធនាគារ ABA លោក Torsten Kleine Buening ត្រូវបានជ្រើសរើសជាសមាជិតក្រុមប្រឹក្សាភិបាល រយៈពេល 2 ឆ្នាំ។

បន្ទាប់ពីកម្មវិធីជ្រើសតាំងនេះ ក៏មានកម្មវិធីជប់លៀងសប្បុរសធម៌ ត្រូវបានធ្វើឡើងជាបន្តទៀត ដើម្បីឆ្លុះបញ្ជាំងពីតួនាទីដ៏សំខាន់របស់វិស័យឯកជន ក្នុងការជួយដល់កំណើនសេដ្ឋកិច្ចរបស់កម្ពុជា។

តាមរយៈកិច្ចខិតខំប្រឹងប្រែងរួមគ្នានេះ AmCham ក៏បានធានានឹងផ្តល់អាហារូបករណ៍ ជាទឹកប្រាក់ជាង $100,000 សម្រាប់អង្គការក្រៅរដ្ឋាភិបាលចំនួនប្រាំមួយ ដែលធ្វើការលើវិស័យអប់រំ។ កម្មវិធីជប់លៀងសប្បុរសធម៌ មានគោលបំណងជំរុញកិច្ចខិតខំប្រឹងប្រែងទាំងនេះ តាមរយៈការរៃអង្គាសថវិកាបន្ថែមទៀត។

ABA មានមោទនភាព ក្នុងការរួមចំណែកអភិវឌ្ឍប្រទេសកម្ពុជា។ ការឧបត្ថម្ភព្រឹត្តិការណ៍នេះស្របតាមបេសកកម្មរបស់ធនាគារយើង។ យើងខ្ញុំជឿជាក់ថា ការគាំទ្ររបស់ធនាគារ មិនត្រឹមតែរួមចំណែកអភិវឌ្ឍបន្ថែម ដល់សកម្មភាពរបស់ AmCham ប៉ុណ្ណោះទេ ថែមទាំងជួយដល់អង្គការក្រៅរដ្ឋាភិបាល ក្នុងការបន្តកសាងមូលដ្ឋានគ្រឹះដ៏រឹងមាំ នៃធនធានសម្រាប់អនាគតរបស់កម្ពុជា៕