ធនាគារ ABA បន្តឧបត្ថម្ភព្រឹត្តិការណ៍ប្រកួត កីឡាតេនីសយុវជន 2017
04/Mar/2017
កាលពីថ្ងៃទី 11-26 កុម្ភៈកន្លងទៅនេះ កម្ពុជា ដែលតំណាងដោយសហព័ន្ធកីឡាតេនីសកម្ពុជា បានបន្តរៀបចំការប្រកួតកីឡាតេនីសយុវជន 2017 នៅក្នុង មជ្ឈមណ្ឌលកីឡាតេនីសជាតិ ។ ព្រឹត្តិការណ៍នេះ ត្រូវបានឧបត្ថម្ភដោយធនាគារ ABA ដើម្បីជាការបន្តគាំទ្រដល់ការវិវឌ្ឍនៃ វិស័យកីឡាតេនីស និងជាការអនុវត្តគោលការណ៍ទំនួលខុសត្រូវសង្គមនិងតម្លៃស្នូលរបស់ធនាគារ ABA។
បន្ទាប់ពីកីឡាករកីឡាការិនីបានបង្ហាញវត្តមាន និងបញ្ចេញអស់សមត្ថភាពនៅទីលានប្រកួត យើងបានរកឃើញម្ចាស់ជ័យលាភីដែលមានដូចជា ផ្នែកបុរសបានទៅលើ Jaewoo Kim មកពីកូរ៉េសម្រាប់សប្ដាហ៍ទី1 និង Seita Wtanabe មកពីជប៉ុនសម្រាប់សប្ដាហ៍ទី2។
ចំណែកផ្នែកនារី បានទៅលើ Yuki Ando មកពីជប៉ុនសម្រាប់សប្ដាហ៍ទី1 និង Rina Saigo សម្រាប់សប្ដាហ៍ទី2។សម្រាប់កីឡាករក្នុងស្រុក ដែលមានបេក្ខជនចូលរួម10រូប មានកីឡាការិនីមួយអាចឈ្នះបានមួយប្រកួត។ កីឡាការិនី ហូ ស្រីណុ បានឈ្នះជុំទីមួយផ្ទួនៗ ហើយទទួលបានបន្ទុកខ្ពស់បំផុតដែលនាងពុំធ្លាប់ទទួលបានក្នុងតារាងពិន្ទុ ITF។
ការប្រកួតតេនីសឆ្នាំនេះ មានការចូលរួមពីកីឡាករ កីឡាការិនី មកពី17ប្រទេស ដែលរួមមាន ប្រទេសកម្ពុជា ចិន តៃប៉ិ កូរ៉េ ជប៉ុន សិង្ហបុរី ឥណ្ឌូណេស៊ី ឥណ្ឌា ម៉ាលេស៊ី រុស្ស៊ី ហ្វីលីពីន វៀតណាម ម៉ាកាវ អូស្ត្រាលី ចក្រភពអង់គ្លេស និងអាមេរិក។ ព្រឹត្តិការណ៍នេះ ត្រូវបានរៀបចំដោយសហព័ន្ធកីឡាតេនីសកម្ពុជា បន្ទាប់ពីឈាប់ឈ្មោះជាប្រទេសក្នុងចំណោមប្រទេសដែលមានការវិវឌ្ឍជឿនលឿនផ្នែកតេនីសនៅអាស៊ីអាគ្នេយ៍។
