ធនាគារ ABA ទទួលការបង់ពន្ធ តាមបណ្ដាញបម្រើសេវាកម្មនានារបស់ខ្លួន
01/Sep/2021
បន្ទាប់ពីបានចុះហត្ថលេខាលើអនុស្សរណៈយោគយល់ជាមួយក្រសួងសេដ្ឋកិច្ច និងហិរញ្ញវត្ថុ (MEF) និងការសាកល្បងដោយជោគជ័យលើការដាក់ឲ្យប្រើប្រាស់សេវាកម្មបង់ពន្ធ យើងខ្ញុំមានសេចក្តីសោមនស្សរីករាយក្នុងការប្រកាសថា ឥឡូវនេះ ធនាគារ ABA ចាប់ផ្ដើមទទួលការបង់ពន្ធតាមមធ្យោបាយផ្សេងៗអាស្រ័យលើប្រភេទពន្ធ សម្រាប់អគ្គនាយកដ្ឋានពន្ធដារ (GDT)។
ឥឡូវនេះ អតិថិជន ABA អាចបង់ពន្ធផ្លូវពីគេហដ្ឋាន ឬកន្លែងធ្វើការ ដោយប្រើកម្មវិធីពន្ធ GDT Taxpayer App។ ពេលបង់ពន្ធតាមរយៈកម្មវិធី GDT Taxpayer App អតិថិជន ត្រូវជ្រើសរើស ABA PAY នៅលើអេក្រង់ទូទាត់ ពេលនោះកម្មវិធី ABA Mobile នឹងបើកដំណើរការដោយស្វ័យប្រវត្តិនៅលើស្មាតហ្វូនរបស់អតិថិជន ដើម្បីដំណើរការទូទាត់ដោយប្រើគណនី ABA ។ នាពេលខាងមុខនេះ GDT និង ABA នឹងពង្រីកសេវាកម្មដើម្បីរួមបញ្ចូលទាំងការប្រមូលពន្ធលើអចលនទ្រព្យប្រចាំឆ្នាំផងដែរ។
អ្នកជាប់កាតព្វកិច្ចពន្ធទាំងអស់ ក៏អាចប្រើសេវាបង់ពន្ធតាមបែបអេឡិកត្រូនិកនៅលើវិបសាយផ្លូវការរបស់ អគ្គនាយកដ្ឋានពន្ធដារ ដែលមានអាសយដ្ឋាន www.tax.gov.kh។ ដោយប្រើប្រាស់សេវាទូទាត់ PayWay ពីធនាគារ ABA ឥឡូវនេះ វិបសាយរបស់អគ្គនាយកដ្ឋាន ក៏អនុញ្ញាតឲ្យអាជីវកម្មតូចធំទាំងអស់ អាចបង់ពន្ធសហគ្រាសប្រចាំខែ និងពន្ធចុះបញ្ជីពាណិជ្ជកម្ម និងពន្ធសវនកម្ម ខណៈពេលដែលបុគ្គលអាចប្រកាសពន្ធលើឈ្នួលផ្ទះ ដី និងពន្ធលើយានយន្តតាមអ៊ីនធឺណិត ដោយមិនចាំបាច់ធ្វើដំណើរ ឬរង់ចាំតាមលេខរៀងនៅបញ្ជរឡើយ។ វិបសាយនេះ ក៏អនុញ្ញាតឲ្យអ្នកបង់ពន្ធ អាចបង្កើតលេខកូដតាមរយៈ e-Filing/Pre-filing ដោយគ្រាន់តែបំពេញព័ត៌មានលម្អិតអំពីការបង់ពន្ធចូលទៅក្នុងប្រព័ន្ធរបស់អគ្គនាយកដ្ឋានពន្ធដារទៅតាមប្រភេទពន្ធ ដែលបានជ្រើសរើសដូចជា ពន្ធលើប្រាក់ចំណូល (TOI) ជាការស្រេច។
លើសពីនេះទៅទៀត អតិថិជន ABA អាចធ្វើការបង់ពន្ធផ្សេងៗនៅបញ្ជរនៃសាខារបស់ធនាគារ ABA ទូទាំងប្រទេសដែលមាន៖
- ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ
- ពន្ធសហគ្រាស
- ពន្ធលើអចលនទ្រព្យ រួមមានពន្ធប្រចាំខែ (ពន្ធលើប្រាក់បៀវត្ស ពន្ធកាត់ទុក ប្រាក់រំដោះពន្ធលើប្រាក់ចំណេញ អាករលើតម្លៃបន្ថែមជាដើម) និងពន្ធប្រចាំឆ្នាំ (ពន្ធលើប្រាក់ចំណូល ពន្ធប៉ាតង់ ជាដើម)
ជាមួយនឹងបញ្ជរប្រមូលពន្ធនៅគ្រប់សាខា គឺមិនគិតថ្លៃសេវាទេ អតិថិជន ABA ឥឡូវនេះ អាចបំពេញកាតព្វកិច្ចបង់ពន្ធ របស់ខ្លួនយ៉ាងងាយស្រួល និងមានសុវត្ថិភាព។
លោក ម៉ី ប៉ូលីន ប្រធានផ្នែកអភិវឌ្ឍន៍អាជីវកម្ម របស់ធនាគារ ABA លើកឡើងថា “យើងមានសេចក្ដីរីករាយ ដែលបានក្លាយជាដៃគូប្រមូលចំណូលពន្ធដារជាមួយស្ថាប័នរាជរដ្ឋាភិបាល។ ការពង្រីកមធ្យោបាយទូទាត់ដែលមានភាពងាយស្រួល បត់បែន និងអាចជឿទុកចិត្តបាន នឹងជួយបង្កើនគុណតម្លៃសម្រាប់អ្នកមានកាតព្វកិច្ចពន្ធ។ ការប្រមូលចំណូលពន្ធ នឹងដើរតួនាទីដ៏សំខាន់ក្នុងនាមជាប្រភពចំណូលមួយ ក្នុងចំណោមប្រភពចំណូលចម្បងៗរបស់រាជរដ្ឋាភិបាល ដោយយោងលើការអនុវត្ដកិច្ចព្រមព្រៀងពាណិជ្ជកម្មសេរី និងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)។ ជាងនេះទៅទៀត ការចូលរួមបង់ពន្ធជូនរដ្ឋ គឺជាការរួមចំណែកដល់ការអភិវឌ្ឍរបស់ប្រទេសជាតិ ដូច្នេះ នេះជាដំណោះស្រាយឈ្នះឈ្នះសម្រាប់គ្រប់ភាគីពាក់ព័ន្ធ ខណៈដែលយើងកំពុងបង្កើតប្រព័ន្ធទូទាត់ដោយមិនប្រើសាច់ប្រាក់ ប្រកបដោយប្រសិទ្ធភាព និងតម្លាភាពសម្រាប់កម្ពុជា”។
សម្រាប់ព័ត៌មានបន្ថែមអំពីសេវាកម្មដែលផ្តល់ដោយ ABA និង អគ្គនាយកដ្ឋានពន្ធដារ សូមទាក់ទងមកធនាគារ ABA តាមរយៈទូរស័ព្ទលេខ 023 225 333 ឬ អគ្គនាយកដ្ឋានពន្ធដារ តាមរយៈលេខ 1277។
តាមរយៈតួនាទីរបស់ខ្លួនក្នុងការអភិវឌ្ឍសេដ្ឋកិច្ចសង្គម ធនាគារ ABA យល់ពីសារៈសំខាន់នៃការបង់ពន្ធ និងការបំពេញកាតព្វកិច្ចក្នុងនាមជាគ្រឹះស្ថានហិរញ្ញវត្ថុដែលបានចុះបញ្ជី និងប្រតិបត្តិការប្រកបដោយអនុលោមភាព។ ដូច្នេះធនាគារបានជាប់ឈ្មោះជាអ្នកបង់ពន្ធធំជាងគេមួយនៅកម្ពុជានៅឆ្នាំ 2020 និងទទួលបានលិខិតសរសើរពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារ ដែលកោតសរសើរនូវការរួមចំណែករបស់ធនាគារក្នុងការអភិវឌ្ឍសេដ្ឋកិច្ចជាតិ។ ធនាគារបង្ហាញនូវការប្តេជ្ញាចិត្ត និងតម្លាភាពក្នុងអភិបាលកិច្ចពន្ធសារជីវកម្មដ៏ល្អរបស់ខ្លួនដោយបំពេញកាតព្វកិច្ចបង់ពន្ធដារជូនរដ្ឋ។
ដោយសារតែការប្តេជ្ញាចិត្តរឹងមាំចំពោះអនុលោមភាពពន្ធដារ ធនាគារ ABA ទទួលបានវិញ្ញាបនបត្រអនុលោមភាពសារពើពន្ធប្រភេទ “មាស” ពីអគ្គនាយកដ្ឋានពន្ធដារ កាលពីខែធ្នូ ឆ្នាំ 2020 ជាមួយ សុពលភាពរយៈពេល 2 ឆ្នាំសម្រាប់ឆ្នាំហិរញ្ញវត្ថុ 2021 និង 2022។
អ្នកអាចដោនឡូតកម្មវិធី ABA Mobile ពី App Store ដែលមានខាងក្រោម៖
