ការប្រកួត ABA Bank ITF Junior Series ត្រឡប់មកវិញក្នុងឆ្នាំ 2020
04/Mar/2020
បន្ទាប់ពីទទួលបានជោគជ័យក្នុងការប្រកួត (ITF) Junior Series របស់សហព័ន្ធកីឡាវាយកូនបាល់អន្តរជាតិ (ITF) ឆ្នាំ 2019 មកធនាគារ ABA មានភាពសោមនស្សរីករាយប្រកាសថា ធនាគារបន្តធ្វើជាអ្នកគាំទ្រឧបត្ថម្ភការប្រកួតឆ្នាំ 2020។ ការប្រកួត "ABA Bank ITF Junior Series 2020" ការប្រកួតឆ្នាំនេះឃើញមានការបន្តការបេ្តជ្ញាចិត្តរបស់ធនាគារក្នុងការអភិវឌ្ឍកីឡាវាយកូនបាល់ឲ្យក្លាយជាកីឡាដែលជំរុញស្មារតីប្រកួតប្រជែងដែលធ្វើឲ្យមានសុខភាពល្អ និងបណ្តុះគំនិតកីឡាករវ័យក្មេងឲ្យចេះបន្ទាបខ្លួន ចេះគោរព និងមានភាពជឿជាក់។
ការប្រកួតនេះផ្តោតលើកីឡាករវ័យក្មេងដែលមានអាយុចាប់ពី 13 – 18 ឆ្នាំ ដែលកំពុងអភិវឌ្ឍខ្លួនឲ្យក្លាយជាកីឡាករអាជីព។ ការប្រកួតដែលមានរយៈពេលមួយឆ្នាំពេញនេះនឹងធ្វើឡើងនៅខេមបូឌាន ខន់ទ្រី ក្លឹប (CCC) និងមានការប្រកួតចំនួនបួនសប្តាហ៍។ ការប្រកួតពីរសប្តាហ៍ដំបូងបានបញ្ចប់កាលពីថ្ងៃទី 29 កុម្ភៈ 2020 ហើយការប្រកួតពីរសប្តាហ៍ចុងក្រោយនឹងត្រូវធ្វើឡើងនៅខែវិច្ឆិកា-ធ្នូ 2020។
អ្នកឈ្នះក្នុងការប្រកួតពីរសប្តាហ៍ដំបូង៖ ប្រភេទនារីទោល Fangran Tian មកពីចិន ជាជើងឯកក្នុងសប្តាហ៍ទីមួយ ហើយ Rion Obata មកពីជប៉ុន ជាជើងឯកក្នុងសប្តាហ៍ទីពីរ។ ប្រភេទបុរសទោល James Van Herseele មកពីប៊ែលហ្សិក ជាជើងឯកក្នុងសប្តាហ៍ទីមួយ ចំណែកឯ Eita Ishikawa មកពីជប៉ុនឈ្នះក្នុងប្រភេទបុរសទោលក្នុងសប្តាហ៍ទីពីរ។
ប្រភេទនារីគូ ជើងឯកក្នុងសប្តាហ៍ទីមួយគឺ Yatawee ChimCham និង Pawinee Ruamnak មកពីថៃចំណែកជើងឯកសប្តាហ៍ទីពីរគឺ Yuina Igarashi មកពីជប៉ុន និង Dainhee Kim មកពីកូរ៉េខាងត្បូង។ ប្រភេទបុរសគូ Asahi Harazaki និង Satoru Nakajima មកពីជប៉ុន ជាជើងឯកទាំងពីរសប្តាហ៍!
"យើងរីករាយដែលការប្រកួត ABA Bank ITF Junior Series 2020 បានចាប់ផ្តើមដោយជោគជ័យ ហើយរាល់ឆ្នាំការប្រកួតនេះមានអ្នកចូលរួមកាន់តែច្រើនឡើង។ នេះជាឆ្នាំទីប្រាំហើយដែលធនាគារ ABA គាំទ្រសហព័ន្ធវាយកូនបាល់កម្ពុជា ហើយក៏ជាឆ្នាំទីពីរដែលធនាគារ ABA ធ្វើជាអ្នកគាំទ្រឧបត្ថម្ភ ITF Series ផងដែរ។ លោក Igor Zimarev នាយកផ្នែកទីផ្សាររបស់ធនាគារ ABA បានមានប្រសាសន៍ថា យើងសង្ឃឹមថាការប្រកួតនេះនឹងជួយលើកកម្ពស់ភាពជាអ្នកកីឡាបន្ថែមទៀតនៅក្នុងប្រទេសកម្ពុជា និងអនុញ្ញាតឲ្យយុវជនរបស់យើងបានប្រកួតប្រជែងជាមួយដៃគូប្រកួតប្រជែងល្អបំផុតនៅក្នុងតំបន់។
លោក TEP Rithivit អគ្គលេខាកីឡាវាយកូនបាល់កម្ពុជា បានមានប្រសាសន៍ថា "យើងមានក្តីរំភើបរីករាយក្នុងការធ្វើជាម្ចាស់ការប្រកួត ITF Juniors រយៈពេលមួយឆ្នាំទៀត កីឡាករមកពីជុំវិញពិភពលោកបានបង្ហាញខ្លួនសម្រាប់ការប្រកួតលើកទី 4 របស់យើង។ យុវជនរបស់យើងបានឆ្លើយតបយ៉ាងល្អ ហើយយុវជនខ្លះទៀតបានបង្ហាញយ៉ាងច្បាស់ថា កម្រិតសមត្ថភាពរបស់ពួកគេគឺល្អគ្រប់គ្រាន់ដើម្បីក្លាយជាអ្នកប្រកួតប្រជែងបាន។ យើងមានសេចក្តីសោមនស្សរីករាយដែលបានឃើញយុវតីកម្ពុជាដំបូងរបស់យើងគឺ Apsara Chhieu ក្លាយជាកីឡាករវ័យក្មេងដំបូងគេរបស់កម្ពុជាដែលរកពិន្ទុ ITF បាន។ សមិទ្ធិផលដ៏អស្ចារ្យមួយនេះដែលធ្វើឲ្យយើងមានមោទនភាពខ្លាំងណាស់” ។
ក្នុងអំឡុងពេល 2 សប្តាហ៍នេះ មានអ្នកចូលរួម 200 នាក់មកពី 21 ប្រទេសផ្សេងៗគ្នា រួមមាន ថៃ វៀតណាម កូរ៉េខាងត្បូង ជប៉ុន ប៊ែលហ្សិក បារាំង ចិនសឹង្ហបូរី ម៉ាឡេស៊ី អូស្ត្រាលី រុស្ស៊ី ហុងកុង និងប្រទេសដទៃទៀត។
ស្របតាមគុណតម្លៃសាជីវកម្មរបស់ខ្លួន ធនាគារ ABA បានផ្តល់ការគាំទ្រដល់សកម្មភាពកីឡាទាំងមូល និងកីឡាវាយកូនបាល់កម្ពុជា ជាពិសេសលើការប្រកួតជាច្រើនដូចជា ITF Futures, ITF Juniors, ITF Team Competitions, សិក្ខាសាលារដ្ឋបាលសហព័ន្ធកីឡាវាយកូនបាល់អាស៊ី ចាប់តាំងពីឆ្នាំ 2016 មក ។ ចាប់ពីពេលនោះមក ធនាគារបានបង្កើនការប្តេជ្ញាចិត្តរបស់ខ្លួនក្នុងការអភិវឌ្ឍការប្រកួតកីឡាដ៏ពេញនិយមនេះ។