ធនាគារ ABA ចុះអនុស្សរណៈយោគយល់ជាមួយក្រសួងការងារ ដើម្បីផ្ដល់កម្ចីការប្រាក់ទាបជូនពលករខ្មែរក្រៅប្រទេស
09/Aug/2024
ABA ដែលជាធនាគារពាណិជ្ជធំបំផុតនៅកម្ពុជា1 មានសេចក្ដីសោមនស្ស និងកិត្តិយសយ៉ាងក្រៃលែង ដែលបានសហការជាមួយក្រសួងការងារ និងបណ្ដុះបណ្ដាលវិជ្ជាជីវៈ (MLVT) ដើម្បីផ្ដល់កម្ចី ដែលមានការប្រាក់ទាប ជូនដល់ពលករ និងសិក្ខាកាមកម្ពុជាស្របច្បាប់ ដែលត្រូវចេញទៅបំពេញការងារនៅក្រៅប្រទេស។
តាមរយៈអនុស្សរណៈនេះ ធនាគារ ABA នឹងផ្ដល់កម្ចីដែលមានអត្រាការប្រាក់ទាប 8.5% ក្នុងមួយឆ្នាំ ជូនដល់ពលករ និងសិក្ខាកាមកម្ពុជា ដែលត្រៀមចេញទៅបម្រើការងារនៅក្រៅប្រទេស។ កម្ចីនេះនឹងកាត់បន្ថយបន្ទុកចំណាយនានា ដែលពាក់ព័ន្ធនឹងដំណើរការរៀបចំសំខាន់ៗមុនពេលចេញដំណើររបស់ពួកគាត់ដូចជា ការរៀបចំឯកសារ ការទទួលបានទិដ្ឋាការ និងសេវាកម្មពាក់ព័ន្ធផ្សេងទៀត។
ពិធីផ្លាស់ប្ដូរអនុស្សរណៈយោគយល់នេះ បានប្រព្រឹត្តទៅកាលពីថ្ងៃសុក្រ ទី9 ខែសីហា ឆ្នាំ2024 នៅឯ វិមានសន្ដិភាព ក្រោមអធិបតីដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា។ នាឱកាសនោះដែរ ក៏មានការអញ្ជើញចូលរួមពី ឯកឧត្តម ហេង សួរ រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ លោក Askhat Azhikhanov នាយកប្រតិបត្តិធនាគារ ABA និងថ្នាក់ដឹកនាំជាន់ខ្ពស់របស់ធនាគារទាំង 7 ផ្សេងទៀត នៅក្នុងគំនិតផ្តួចផ្តើមនេះ។
តាមរយៈការផ្ដល់ឥណទាន ដែលមានការប្រាក់សមរម្យ និងលក្ខខណ្ឌកម្ចីងាយស្រួលនេះ ធនាគារ ABA អាចផ្ដល់លទ្ធភាពជូនពលករ និងសិក្ខាកាមខ្មែរ ក្នុងការចាប់ផ្ដើមអាជីពនៅក្រៅប្រទេសប្រកបដោយទំនុកចិត្ត និងស្ថិរភាពហិរញ្ញវត្ថុ។ គំនិតផ្ដួចផ្ដើមនេះ ឆ្លុះបញ្ចាំងពីការប្ដេជ្ញាចិត្តឥតងាករេរបស់ ABA ចំពោះប្រជាពលរដ្ឋកម្ពុជា តាមរយៈការរួមចំណែក ក្នុងការអភិវឌ្ឍប្រកបដោយនិរន្ដរភាពរបស់កម្ពុជា។
ធនាគារ ABA នៅតែប្ដេជ្ញាយ៉ាងមុតមាំ ក្នុងការបន្ដធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា និងគាំទ្រគំនិតផ្ដួចផ្ដើមនានា សំដៅជំរុញវឌ្ឍនភាពយូរអង្វែងរបស់កម្ពុជា ក៏ដូចជារួមចំណែកពង្រឹងសមត្ថភាពរបស់ប្រជាពលរដ្ឋកម្ពុជា៕
1ABA គឺជាធនាគារពាណិជ្ជធំបំផុតនៅកម្ពុជាគិតលើទ្រព្យសកម្ម, ប្រាក់បញ្ញើ, កម្ចីដុល និងប្រាក់ចំណេញ ផ្អែកលើរបាយការណ៍ត្រួតពិនិត្យប្រចាំឆ្នាំ 2021 ដល់ 2023 របស់ធនាគារជាតិនៃកម្ពុជា។
