ABA ទទួលបានពាន ធនាគារដ៏ឆ្នើមបំផុត នៅកម្ពុជាប្រចាំឆ្នាំ២០១៨ ពី Global Finance
24/Apr/2018
Global Finance ដែលជាទស្សនាវដ្ដីហិរញ្ញវត្ថុអន្តរជាតិ បានផ្តល់កិត្តិនាមដល់ធនាគារ ABA ថាជា “ធនាគារដ៏ឆ្នើមបំផុតនៅកម្ពុជាប្រចាំឆ្នាំ២០១៨” នាឱកាស ប្រកាសពានរង្វាន់ធនាគារឆ្នើមប្រចាំឆ្នាំ លើកទី២៥របស់ខ្លួន។ ការទទួលស្គាល់នេះ គឺជាលើកទី៤ ក្នុងរយៈពេល ៤ឆ្នាំ ជាប់ៗគ្នាដែលធនាគារ ABA បានទទួលពានរង្វាន់ដ៏កំពូលពីទស្សនាវដ្ដីហិរញ្ញវត្ថុអន្តរជាតិមួយនេះ។
ចំពោះពានរង្វាន់កំពូលនេះ Global Finance បានធ្វើការវិនិច្ឆ័យទៅលើកត្តាជាក់ស្តែងសំខាន់ៗមួយចំនួនរួមមាន៖វឌ្ឍនភាពនៃទ្រព្យសកម្ម, កម្រិតប្រាក់ចំណេញ, វិសាលភាពភូមិសាស្ត្រនៃប្រតិបត្តិការការងារ, ទំនាក់ទំនងជាយុទ្ធសាស្ត្រ, ការអភិវឌ្ឍផ្នែកពាណិជ្ជកម្មថ្មី, និងភាពច្នៃប្រឌិតក្នុងការបង្កើតផលិតផល។ បន្ថែមពីលើលក្ខណៈវិនិច្ឆ័យជាក់ស្តែងទាំងអស់នេះ ការយល់ឃើញរបស់អ្នកវិភាគតម្លៃទ្រព្យកម្មសិទ្ធិ, អ្នកវិភាគចំណាត់ថ្នាក់ឥណទាន, ទីប្រឹក្សាធនាគារ, និងអ្នកជំនាញដទៃទៀតក្នុងឧស្សាហកម្មមួយនេះ ក៏ត្រូវបានរាប់បញ្ចូលក្នុងដំណើរការជ្រើសរើសវាយតម្លៃនេះផងដែរ។
ថ្លែងក្នុងឱកាសដ៏ពិសេសនេះ លោក Askhat Azhikhanov នាយកប្រតិបត្តិនៃធនាគារ ABA បានថ្លែងថា៖ “យើងមានកិត្តិយសជាខ្លាំងដែលត្រូវបានទទួលស្គាល់ដោយទស្សនាវដ្ដីហិរញ្ញវត្ថុអន្តរជាតិមួយនេះជាលើកទី៤ ក្នុងរយៈពេល៤ឆ្នាំជាប់ៗគ្នា។ ពានរង្វាន់មួយនេះ គឺជាការទទួលស្គាល់ជាថ្មីម្តងទៀតចំពោះឧត្តមភាពការងារប្រកបដោយវិជ្ជាជីវៈរបស់យើង, កិច្ចខិតខំប្រឹងប្រែងក្នុងការអភិវឌ្ឍបរិយាបន្នហិរញ្ញវត្ថុនៅកម្ពុជា, និងការប្តេជ្ញាជាដរាបរបស់យើងក្នុងការផ្តល់សេវាប្រកបដោយគុណភាព និងដំណោះស្រាយផ្នែកហិរញ្ញវត្ថុដែលប្រកបដោយការច្នៃប្រឌិតខ្ពស់ ជូនដល់អតិថិជនដ៏មានតម្លៃរបស់យើង។” លោកបន្តថា៖ “យើងនឹងបន្តធ្វើកិច្ចការងារ ដើម្បីនៅតែជាដៃគូធនាគារ និងជាអ្នកផ្តល់ដំណោះស្រាយហិរញ្ញវត្ថុឈានមុខបែបឌីជីថលរបស់បុគ្គល, សហគ្រិន, និងអាជីវកម្មទាំងឡាយក្នុងប្រទេសកម្ពុជា”។
លោក Joseph D. Giarraputo នាយកផ្នែកបោះពុម្ពផ្សាយ និងជានិពន្ធនាយកនៃទស្សនាវដ្តី Global Finance បានមានប្រសាសន៍ថា៖ «ធនាគារ ABA ច្បាស់ណាស់ គឺជាធនាគារដែលឈានមុខគេក្នុងប្រទេសកម្ពុជា បើយោងទៅតាមលទ្ធផលពីក្បួនវិភាគកុំព្យូទ័រ និងការវិភាគរបស់យើង។ យើងពិតជាស្ញើចសរសើរជាមួយនឹងដំណោះស្រាយនានាដែលធនាគារមាន និងការបម្រើសេវាជូនដល់អតិថិជនរបស់ធនាគារ ហើយជាពិសេសនោះ គឺការយល់ដឹងយ៉ាងច្បាស់ពីលក្ខខណ្ឌក្នុងស្រុក និងតម្រូវការអតិថិជនផ្នែកសាជីវកម្មនៅក្នុងទីផ្សាររបស់ខ្លួន។» លោកក៏បានបន្ថែមទៀតថា៖ «គុណភាពនៃថ្នាក់ដឹកនាំរបស់ធនាគារ ក៏មានលក្ខណៈលេចធ្លោផងដែរ ដូចដែលបានឆ្លុះបញ្ចាំងតាមរយៈលទ្ធផលហិរញ្ញវត្ថុដែលយើងឃើញស្រាប់»។
ពិធីប្រគល់ពានរង្វាន់ធនាគារឆ្នើមបំផុតនេះ នឹងប្រារព្ធឡើងស្របពេលជាមួយកិច្ចប្រជុំប្រចាំឆ្នាំរបស់ធនាគារពិភពលោក (World Bank) និងមូលនិធិរូបិយវត្ថុអន្តរជាតិ(IMF) នៅថ្ងៃទី១៣ ខែតុលា នៅក្រុងបាលី ប្រទេសឥណ្ឌូនេស៊ី។ បញ្ជីរាយនាមធនាគារជ័យលាភី ធនាគារឆ្នើមបំផុតប្រចាំឆ្នាំ២០១៨ របស់ទស្សនាវដ្ដី Global Finance នឹងចុះផ្សាយនៅក្នុងខែឧសភានៃទស្សនាវដ្ដីផ្ទាល់តែម្តង។
ធនាគារ ABA នៅតែបន្តទទួលបានការកោតសរសើរពីទស្សនាវដ្ដីហិរញ្ញវត្ថុអន្តរជាតិនានា ចំពោះការអនុវត្តយុទ្ធសាស្ត្រជាចីរភាព និងការកែសម្រួលបែបបទអាជីវកម្មរបស់ខ្លួន ដើម្បីផ្តល់ជូននូវសេវាកម្មហិរញ្ញវត្ថុដែលទំនើបទាន់សម័យសម្រាប់ទីផ្សារក្នុងប្រទេសកម្ពុជា។ ហេតុដូច្នេះហើយ ទើប Global Finance បានផ្តល់ពានរង្វាន់ដល់ធនាគារ ABA ថាជា “ធនាគារដ៏ឆ្នើមបំផុតនៅកម្ពុជា” ក្នុងឆ្នាំ២០១៥ ដល់ ២០១៨ បួនឆ្នាំជាប់គ្នា និងជា “ធនាគារពាណិជ្ជកម្មដ៏ឆ្នើមបំផុតនៅកម្ពុជា” ប្រចាំឆ្នាំ២០១៧ និង២០១៨។ លើសពីនេះ ធនាគារ ABA ត្រូវបានប្រសិទ្ធនាមថាជា “ធនគារដ៏ឆ្នើមបំផុតនៅកម្ពុជា” ដោយទស្សនាវដ្ដី Euromoney ពីឆ្នាំ២០១៤ ដល់ ២០១៧ បួនឆ្នាំជាប់គ្នា និងជា “ធនាគារប្រចាំឆ្នាំ” ដោយស្ថាប័នហិរញ្ញវត្ថុ The Banker ក្នុងឆ្នាំ២០១៤ និងឆ្នាំ២០១៦។
អំពីទស្សនាវដ្តី Global Finance
Global Finance គឺជាទស្សនាវដ្តីចេញផ្សាយប្រចាំខែ ដែលបង្កើតឡើងតាំងពីឆ្នាំ ១៩៨៧។ ទស្សនាវដ្តីនេះមានបេសកកម្មជួយដល់អ្នកដឹកនាំសាជីវកម្ម, ធនាគារិក, និងវិនិយោគិនក្នុងការធ្វើផែនការតម្រង់ទិសតាមហិរញ្ញវត្ថុ និងពាណិជ្ជកម្មសកល។ ទស្សនាវដ្តី Global Finance មានអ្នកអានក្នុងប្រទេសចំនួន ១៨៩ និងមានស្នាក់ការកណ្តាលក្នុងទីក្រុងញូយ៉ក និងការិយាល័យនៅទីក្រុងឡុង និងមីឡាន។ អ្នកអានទស្សនាវដ្តី Global Finance ភាគច្រើនជាប្រធានក្រុមប្រឹក្សាភិបាល, អគ្គនាយកក្រុមហ៊ុន, នាយកប្រតិបត្តិ, នាយកហិរញ្ញវត្ថុ, រតនាគារិក, និងប្រធានហិរញ្ញវត្ថុជាន់ខ្ពស់ ដែលមានតួនាទីសំខាន់ក្នុងការសម្រេចចិត្តលើការវិនិយោគ និងយុទ្ធសាស្ត្រពាណិជ្ជកម្មក្នុងស្ថាប័នដែលជាក្រុមហ៊ុនអន្តរជាតិ និងស្ថានប័នហិរញ្ញវត្ថុនានា។
ជារៀងរាល់ឆ្នាំ Global Finance បានធ្វើការជ្រើសរើសស្ថាប័នហិរញ្ញវត្ថុដែលល្អបំផុតនៅទូទាំងពិភពលោក។ ពានរង្វាន់ទាំងនេះត្រូវបានទទួលស្គាល់ និងជឿទុកចិត្តតាមឧត្តមភាពស្តង់ដាររបស់សហគមន៍ហិរញ្ញវត្ថុសកល។