ធនាគារ ABA និង ក្រុមហ៊ុនមេនូឡាយហ្វ៍ ផ្តល់សេវាកម្មបង់បុព្វលាភរ៉ាប់រងតាមទូរស័ព្ទដល់អតិថិជន
07/Aug/2019
ធនាគារ ABA ដែលជាសមាជិកសម្ពន្ធធនាគារជាតិកាណាដា និង ក្រុមហ៊ុន មេនូឡាយហ្វ៍ ខេមបូឌា ដែលជាក្រុមហ៊ុនធានារ៉ាប់រងអាយុជីវិតឈានមុខគេមួយ បានធ្វើការប្រកាសជាផ្លូវការ ស្តីពីការបង់បុព្វលាភរ៉ាប់រងតាមទូរស័ព្ទ ដែលកិច្ចសហការនេះនឹងអនុញ្ញាតឲ្យអតិថិជនរបស់ក្រុមហ៊ុន មេនូឡាយហ្វ៍ អាចបង់បុព្វលាភរ៉ាប់រងតាមរយៈកម្មវិធី ABA Mobile បានដោយឥតគិតថ្លៃ។
កិច្ចសហការរវាងស្ថាប័នហិរញ្ញវត្ថុឈានមុខទាំងពីរនេះ ត្រូវបានធ្វើឡើងបន្ថែមលើកិច្ចសហការជាដៃគូចែកចាយផលិតផលធានារ៉ាប់រងអាយុជីវិត ដែលស្ថាប័នទាំងពីរបានចុះកិច្ចព្រមព្រៀងកាលពីឆ្នាំ 2016។ តាមរយៈកម្មវិធី ABA Mobile អតិថិជនអាចធ្វើការទូទាត់ប្រាក់បានយ៉ាងឆាប់រហ័ស ងាយស្រួល និងមានសុវត្ថិភាពគ្រប់ពេលវេលា គ្រប់ទីកន្លែង ដោយគ្រាន់តែអនុវត្តតាមជំហានសាមញ្ញៗដូចខាងក្រោម៖
- បើកដំណើរការកម្មវិធី ABA Mobile ហើយចុចយកប៊ូតុង “ទូទាត់ប្រាក់”
- ជ្រើសរើសយកពាក្យ “ធានារ៉ាប់រង”
- ជ្រើសរើសយក “មេនូឡាយហ្វ៍ ខេមបូឌា”
- ជ្រើសរើស គណនី ABA របស់លោកអ្នក ហើយវាយបញ្ចូលលេខស្នើសុំប័ណ្ណសន្យារ៉ាប់រង ឬលេខប័ណ្ណសន្យា រ៉ាប់រងរបស់លោកអ្នក
- ចុចយកពាក្យ “រួចរាល់” ហើយចុចលើប៊ូតុង “បង់ឥឡូវ” រួចបញ្ចាក់ការទូទាត់ដោយបញ្ចូលលេខសម្ងាត់ ABA Mobile របស់លោកអ្នក។
“នៅក្រុមហ៊ុន មេនូឡាយហ្វ៍ យើងមានបេសកកម្មដ៏ច្បាស់លាស់មួយក្នុងការជួយឲ្យអតិថិជនរបស់យើងធ្វើការ សម្រេចចិត្តកាន់តែងាយស្រួលនិងជីវិតកាន់តែប្រសើរជាងមុន។ យុទ្ធសាស្ត្រដ៏សំខាន់មួយដើម្បីឲ្យយើងអាចសម្រេចបេសកកម្មនេះបាន គឺការធ្វើជាក្រុមហ៊ុនឈានមុខមួយផ្នែកឌីជីថលនៅក្នុងទីផ្សារ។ ខ្ញុំមានមោទនភាពក្រៃលែងចំពោះ សមិទ្ធផលដែលយើងកំពុងប្រកាសជាផ្លូវការជាមួយធនាគារ ABA ដែលកិច្ចសហការនេះនឹងផ្ដល់បទពិសោធក្នុងការទូទាត់ប្រាក់បែបឌីជីថល (ដោយមិនប្រើប្រាស់សាច់ប្រាក់ផ្ទាល់) ដល់អតិថិជនរបស់យើងទូទាំងប្រទេស ដែលត្រូវការបង់បុព្វលាភរ៉ាប់រងមកក្រុមហ៊ុន មេនូឡាយហ្វ៍” នេះបើតាមប្រសាសន៍របស់លោក Robert Elliott អគ្គនាយកប្រតិបត្តិ និងនាយកចាត់ការទូទៅនៃក្រុមហ៊ុន មេនូឡាយហ្វ៍ ខេមបូឌា។
“មេនូឡាយហ្វ៍ ខេមបូឌា គឺជាដៃគូយុទ្ធសាស្ត្ររបស់យើង។ ចាប់តាំងពីកិច្ចសហប្រតិបត្តិការដំបូងរបស់យើងនៅក្នុងឆ្នាំ 2016 យើងសម្រេចបាន ការនាំមកនូវដំណោះស្រាយធានារ៉ាប់រងអាយុជីវិតដែលមានគុណភាពជូនអតិថិជនរបស់យើង ជាច្រើននាក់។ ការសម្ពោធដាក់ឲ្យប្រើប្រាស់ នូវសេវាបង់បុព្វលាភរ៉ាប់រងតាមទូរស័ព្ទដល់អតិថិជននេះ នឹងជួយពួកគាត់ ក្នុងការទូទាត់សេវាធានារ៉ាប់រងពីផ្ទះ ឬពីការិយាល័យរបស់ពួកគេតែម្តង បានយ៉ាងងាយស្រួល និងមានផាសុកភាព។ យើងជឿជាក់ថា មុខងារនេះនឹងនាំយកបន្ថែមនូវភាពងាយស្រួល ដល់អតិថិជនរបស់ធនាគារ ABA និងមេនូឡាយហ្វ៍ ហើយនឹងជួយពន្លឿនការវិវឌ្ឍរបស់ប្រទេស ឈានទៅរកសង្គមមួយដែលធ្វើការទូទាត់បែបឌីជីថលដ៏ទំនើបដោយមិន ចាំបាច់ប្រើសាច់ប្រាក់” នេះបើតាមប្រសាសន៍របស់លោក Askhat Azhikhanov នាយកប្រតិបត្តិរបស់ធនាគារ ABA។
សម្រាប់ព័ត៌មានបន្ថែមអំពីសេវាកម្មបង់បុព្វលាភរ៉ាប់រងនេះ លោកអ្នកអាចទាក់ទងមកកាន់ក្រុមហ៊ុន មេនូឡាយហ្វ៍ ខេមបូឌា តាមរយៈលេខទូរស័ព្ទ 1800-211-211 (ឥតគិតថ្លៃ) ឬធនាគារ ABA តាមរយៈលេខទូរស័ព្ទ 023 225 333។
ទំនាក់ទំនងសម្រាប់សារព័ត៌មាន
មេនូឡាយហ្វ៍ ខេមបូឌា | ធនាគារ ABA |
លោក តារា សៅយុទ្ធនា ប្រធានជាន់ខ្ពស់ផ្នែកទំនាក់ទំនង 011 759 964 [email protected] | លោក ឡាច វណ្ណៈ អ្នកគ្រប់គ្រងទំនាក់ទំនងសាធារណៈ 098 630 281 [email protected] |
អំពីក្រុមហ៊ុន មេនូឡាយហ្វ៍ ខេមបូឌា
ក្រុមហ៊ុន មេនូឡាយហ្វ៍ ខេមបូឌា បានចាប់ផ្តើមប្រតិបត្តិការរបស់ខ្លួននៅថ្ងៃទី 28 ខែមិថុនា ឆ្នាំ 2012 ។ ក្នុងនាមជាក្រុមហ៊ុនធានារ៉ាប់រងអាយុជីវិតបរទេសដំបូងនៅក្នុងព្រះរាជាណាចក្រកម្ពុជា ក្រុមហ៊ុន មេនូឡាយហ្វ៍ ខេមបូឌា បានប្តេជ្ញាចិត្តក្នុងការផ្តល់ជូនអតិថិជនរបស់ខ្លួននូវផលិតផល និងសេវាកម្មការពារហិរញ្ញវត្ថុដែលជាតម្រូវការចាំបាច់របស់ពួកគាត់។ សម្រាប់ព័ត៌មានបន្ថែម សូមចូលទៅគេហទំព័រ www.manulife.com.kh ឬទំព័រ Facebook៖ ManulifeKh។
ក្រុមហ៊ុន មេនូឡាយហ្វ៍ ហ្វាយនែនសល គឺជាក្រុមហ៊ុនផ្តល់សេវាកម្មហិរញ្ញវត្ថុឈានមុខគេមួយលំដាប់ថ្នាក់អន្តរជាតិដែលជួយប្រជាជនក្នុងការសម្រចចិត្តឲ្យកាន់តែមានភាពងាយស្រួលនិងធ្វើឲ្យជិវីតកាន់តែប្រសើរឡើង។ យើងបានដំណើរការជាក្រុមហ៊ុន John Hancock នៅសហរដ្ឋអាមេរិក និងជាក្រុមហ៊ុន មេនូឡាយហ្វ៍ នៅបណ្តាប្រទេសផ្សេងៗទៀតក្នុងពិភពលោក។ យើងផ្តល់ការប្រឹក្សាហិរញ្ញវត្ថុ ដំណោះស្រាយធានារ៉ាប់រង ព្រមទាំងផលិតផល និងសេវាកម្មគ្រប់គ្រងទ្រព្យសម្បត្តិជូនដល់អតិថិជនជាលក្ខណៈបុគ្គល ជាក្រុម និងជាស្ថាប័ន។ គិតត្រឹមចុងឆ្នាំ 2018 យើងមានបុគ្គលិកបម្រើការងាជាង 34,000 នាក់ ភ្នាក់ងារធានារ៉ាប់រងប្រមាណ 82,000 នាក់ និងដៃគូចែកចាយផលិតផលធានារ៉ាប់រងអាយុជីវិតរាប់ពាន់ដៃគូផ្សេងទៀត ដែលកំពុងបម្រើសេវាកម្មជូនអតិថិជនប្រមាណ 28 លាននាក់។ គិតត្រឹមថ្ងៃទី 31 ខែមិនា ឆ្នាំ 2019 យើងមានសាច់ប្រាក់ប្រតិបត្តិការចំនួន 1.1 ទ្រីលានដុល្លារកាណាដា ឬ 849 ពាន់លានដុល្លារអាមេរិកដែលជាទ្រព្យសកម្ម។ គិតត្រឹមរយៈពេល 12 ខែចុងក្រោយ យើងបានបង់ជូនជាអត្ថប្រយោជន៍ ការប្រាក់ និងការចំណាយផ្សេងៗជូនដល់អតិថិជនរបស់យើងដែលមានតម្លៃជាសាច់ប្រាក់ចំនួន 29.4 ពាន់លានដុល្លារ។ យើងមានប្រតិបត្តិការធំៗនៅអាស៊ី កាណាដា និងសហរដ្ឋអាមេរិក ហើយយើងបានបម្រើអតិថិជនរបស់យើងអស់រយៈពេលច្រើនជាង 100 ឆ្នាំ មកហើយ។ យើងមានស្នាក់ការកណ្តាលជាសកលរបស់យើងនៅទីក្រុង Toronto ប្រទេស កាណាដា ហើយក្រុមហ៊ុន មេនូឡាយហ្វ៍ Manulife Financial Corporation បានធ្វើប្រតិបត្តិការអាជីវកម្មជា MFC នៅទីផ្សារមូលប័ត្រ តូរ៉ុនតូ (TSX)ញូវយ៉ក(NYSE) និងទីផ្សារមូលប័ត្រហ្វីលីពីន ហើយនៅលើទីផ្សារមូលប័ត្រហុងកុង(SEHK) ក្រោមឈ្មោះ 945។