ធនាគារ ABA និងធនាគារ ចិន បានចុះអនុស្សរណៈយោគយល់គ្នា លើកិច្ចសហប្រតិបត្តិការរូបិយប័ណ្ឌប្រាក់រៀល និងប្រាក់យ័ន
26/Nov/2024
ធនាគារ ABA ដែលជាធនាគារពាណិជ្ជធំជាងគេនៅកម្ពុជា1 និងធនាគារ ចិន សាខាភ្នំពេញ ដែលជាធនាគារក្នុងស្រុកដើរតួជាគ្រឹះស្ថានទូទាត់ប្រាក់យ័ន (RMB) បានចុះហត្ថលេខាលើអនុស្សរណៈយោគយល់គ្នា (MOU) ស្តីពីកិច្ចសហប្រតិបត្តិការជាដៃគូយុទ្ធសាស្ត្រលើរូបិយប័ណ្ឌ ដើម្បីពង្រឹងការទូទាត់ប្រាក់ឆ្លងប្រទេសរវាងកម្ពុជា និងចិន។
ពិធីចុះហត្ថលេខានេះធ្វើឡើងនៅថ្ងៃទី 22 ខែវិច្ឆិកា ឆ្នាំ 2024 ដែលចូលរួមដោយ លោក Zhiger Atchabarov ប្រធានផ្នែកប្រតិបត្តិការនៃ ធនាគារ ABA លោក Liu Daozhi នាយកប្រតិបត្តិនៃធនាគារចិន តំណាងធនាគារជាតិនៃកម្ពុជា និងភ្ញៀវកិត្តិយសផ្សេងទៀត។
ភាពជាដៃគូយុទ្ធសាស្ត្រនេះ គឺគោលបំណងជួយសម្រួលដល់ពាណិជ្ជកម្ម និងការវិនិយោគឆ្លងប្រទេស ដោយដំណើរការប្រតិបត្តិការប្រាក់រៀល និងប្រាក់យ័ន យ៉ាងងាយស្រួល។ កិច្ចសហការនេះ នឹងផ្តល់ឱ្យអតិថិជន ABA នូវសេវាកម្មហិរញ្ញវត្ថុក្នុងប្រាក់យ័ន កាន់តែទូលំទូលាយ រួមមាន ប្រតិបត្តិការប្តូររូបិយប័ណ្ណផ្ទាល់ និងកិច្ចសន្យាប្តូររូបិយប័ណ្ណទុកមុន។ កិច្ចសហការនេះ ក៏បានត្រួសត្រាយផ្លូវដល់ ABA និងធនាគារចិន ក្នុងការរួមគ្នាអភិវឌ្ឍផលិតផលហិរញ្ញវត្ថុជាប្រាក់រៀល និងប្រាក់យ័ន ដើម្បីជាប្រយោជន៍ដល់អតិថិជនរបស់ពួកគេ។
ធនាគារ ABA នៅតែបន្តប្តេជ្ញាចិត្តក្នុងការផ្តល់នូវដំណោះស្រាយហិរញ្ញវត្ថុដែលផ្តោតសំខាន់លើអតិថិជនដ៏ងាយស្រួល ហើយភាពជាដៃគូជាមួយធនាគារ ចិន នេះបានគូសបញ្ជាក់ពីការយកចិត្តទុកដាក់របស់ ABA ក្នុងការផ្តល់នូវសេវាកម្មអតិថិជនដ៏ល្អឥតខ្ជោះ។
1 ABA គឺជាធនាគារពាណិជ្ជធំជាងគេនៅកម្ពុជា គិតលើទ្រព្យសកម្មសរុប ប្រាក់បញ្ញើ និងប្រាក់កម្ចី យោងតាមរបាយការណ៍ត្រួតពិនិត្យរបស់ធនាគារជាតិនៃកម្ពុជាឆ្នាំ 2021-2023។
