ABA រួមចំណែកក្នុងគំនិតផ្តួចផ្តើមចែកកញ្ចប់អាហារស្រាយបួស របស់សហគម CATA ជូនដល់បងប្អូនសាសនិកឥស្លាម ចំនួន 350 គ្រួសារ
16/Mar/2026
ធនាគារ ABA មានសេចក្ដីសោមនស្សក្នុងការឧបត្ថម្ភគាំទ្រ គំនិតផ្តួចផ្តើមចែកកញ្ចប់អាហារស្រាយបួសរបស់ សមាគមអាម៉ាណះតាកាហ្វុលកម្ពុជា (CATA) ដោយផ្តល់នូវស្បៀងអាហារ ជូនដល់បងប្អូនសាសនិកឥស្លាមដែលមានជីវភាពខ្វះខាតចំនួន 350 គ្រួសារ ស្ថិតក្នុងខេត្តកំពង់ចាម និងខេត្តត្បូងឃ្មុំ។
នាថ្ងៃទី13 ខែមីនា ក្រុមការងារ ABA និងអ្នកតំណាងពីសមាគម CATA បានចុះចែកកញ្ចប់អាហារ ដែលក្នុងនោះរួមមាន អង្ករ មី ទឹកដោះគោ និងសម្ភារៈចម្អិនចាំបាច់ជាច្រើនទៀត ជូនដល់បងប្អូនសាសនិកឥស្លាមដែលមានតម្រូវការ។ អំណោយជាសម្ភារៈទាំងនេះ នឹងជួយឲ្យពួកគាត់រៀបចំអាហារ នាខែរ៉ាម៉ាឌន សម្រាលបន្ទុកជីវភាពប្រចាំថ្ងៃ និងជំរុញស្មារតីសាមគ្គីភាព។
លោក លាន ស៉ារ៉ា ប្រធានសាខាធនាគារ ABA ខេត្តកំពង់ចាម មានប្រសាសន៍ថា “ការគាំទ្ររបស់ ABA ចំពោះគំនិតផ្តួចផ្តើមនេះ គឺជាផ្នែកមួយនៃការប្តេជ្ញាចិត្តរបស់យើងខ្ញុំ ក្នុងការបង្កើតសហគមដែលមានភាពរឹងមាំ។ កិច្ចសហការជាមួយសមាគម CATA ធានាបានថា ការរួមចំណែករបស់យើងខ្ញុំ បានទៅដល់ដៃក្រុមគ្រួសារដែលមានតម្រូវការយ៉ាងពិតប្រាកដ ដោយផ្តល់ជូនការគាំទ្រទាន់ពេលវេលាក្នុងរដូវកាលដ៏ពិសិដ្ឋនេះ”។
លោក សេន សាម៉ាន នាយកប្រតិបត្តិនៃសមាគម CATA មានប្រសាសន៍ថា “កម្មវិធីនេះ បានរៀបចំឡើង ដើម្បីឆ្លុះបញ្ចាំងអំពីបេសកកម្មរបស់យើងខ្ញុំ ក្នុងការបម្រើសហគមន៍ជាមួយនឹងការយកចិត្តទុកដាក់ និងក្តីស្រឡាញ់។ ជាមួយការគាំទ្រពី ABA យើងខ្ញុំអាចនាំយកជំនួយដ៏មានអត្ថន័យ ទៅកាន់កន្លែងដែលមានតម្រូវការបំផុត។”
កិច្ចសហប្រតិបត្តិការនេះ គូសបញ្ជាក់អំពីការប្តេជ្ញាចិត្តជាបន្តបន្ទាប់របស់ ABA ក្នុងការគាំទ្រគំនិតផ្តួចផ្តើមនានាដែលលើកកម្ពស់បរិយាបន្ន និងសុខុមាលភាពសហគមន៍។ ការសហការជាមួយ CATA បានបន្តជំរុញ ABA ក្នុងការពង្រឹងភាពជាដៃគូសហការ និងរួមចំណែកដល់ការអភិវឌ្ឍប្រកបដោយចីរភាពទូទាំងប្រទេស។
