ធនាគារABAក្លាយជាធនាគារឆ្នើមបំផុតប្រចាំឆ្នាំ
08/Dec/2016
ធនាគារ ABA ដែលជាធនាគារមួយក្នុងចំណោមធនាគារពាណិជ្ជឈានមុខគេក្នុងប្រទេសកម្ពុជា ត្រូវបានឧទ្ទេសនាមជា ធនាគារឆ្នើមបំផុតប្រចាំឆ្នាំ2016 ពី The Banker ដែលជាទស្សនាវដ្ដីហិរញ្ញវត្ថុ មានឈ្មោះល្បីលើពិភពលោកដែលមានមូលដ្ឋាននៅទីក្រុងឡុងដ៍ (ចក្រភពអង់គ្លេស)។ ពិធីអបអរសាទរទទួលពានរង្វាន់កិត្តិយសនេះបានប្រព្រឹត្តទៅនៅទីក្រុងឡុងដ៍ នាថ្ងៃទី07 ខែធ្នូ នេះ ដែលមានធនាគារិកមកពីជុំវិញពិភពលោកចូលរួមជាកិត្តិយស ដើម្បីអបអរសាទរចំពោះភាពជោគជ័យនិងសមិទ្ធផលដ៏ត្រចះត្រចង់នេះ។
ការសម្រេចចិត្តរបស់គណៈកម្មការគឺសង្កត់ធ្ងន់ទៅលើភាពរឹងមាំផ្នែកហិរញ្ញវត្ថុ និរន្តភាពនៃការនាំមកនូវបច្ចេកវិទ្យាច្នៃប្រឌិតខ្ពស់ និងការអនុវត្តន៍នូវគំរូអាជីវកម្មដ៏ឆ្នើមបំផុត។ ជាមួយគ្នានេះដែរ គណៈកម្មការក៏បានកោតសរសើរនូវភាពជោគជ័យ នៃសេវាកម្មធនាគារឆ្លាតវៃ របស់ធនាគារ ABA ដែល ជាសេវាកម្មដែលអាចឲ្យអតិថិជនធ្វើប្រតិបត្តិការធនាគារនៅគ្រប់ទីកន្លែងនិងគ្រប់ពេលវេលា បន្ថែមជាងនេះទៅទៀតគឺមានការផ្តល់ជំនួយលើសេវាកម្ម 24ម៉ោង លើ 24ម៉ោង។
លោក Askhat Azhikhanov នាយកប្រតិបត្តិធនាគារ ABA បានធ្វើការកត់សម្គាល់ថា “យើងមានកិត្តិយសណាស់ដែលត្រូវបានឧទ្ទេសនាមជាធនាគារឆ្នើមបំផុតប្រចាំឆ្នាំនៅប្រទេសកម្ពុជាពីទស្សនាវដ្ដីហិរញ្ញវត្ថុ The Banker។ ការប្រកាសទទួលស្គាល់នេះសបញ្ជាក់ឲ្យឃើញពីភាពឥតខ្ចោះក្នុងការបម្រើសេវាកម្ម និងបង្ហាញពីភាពជោគជ័យរបស់យើងក្នុងការផ្តល់ជូននូវដំណោះស្រាយហិរញ្ញវត្ថុបែបឌីជីថលដ៏ទំនើបដល់អតិថិជន។ លោកក៏បានបន្ថែមទៀតថា ៖ “ឆ្នាំនេះយើងបន្តអនុវត្តគំរូអាជីវកម្មដ៏ត្រឹមត្រូវរបស់យើង និងបន្តប្រើយុទ្ឋសាស្ត្រក្នុងការអភិវឌ្ឍន៍សេវាកម្មស្វ័យធនាគារ។ ខ្ញុំមានភាពជឿជាក់ថាការសហការណ៍ជាមួយធនាគារជាតិកាណាដា បានធ្វើឲ្យគណៈកម្មការមានទំនុកចិត្តនិងជឿជាក់ថាធនាគារ ABA មានភាពរឹងមាំ និងការអភិវឌ្ឍន៍យ៉ាងឆាប់រហ័សជាងគេបំផុតក្នុងប្រទេសកម្ពុជា។”
ក្នុងឆ្នាំ 2016 ធនាគារ ABA មានការរីកចម្រើនជាច្រើនគួរឲ្យកត់សម្គាល់។ ជាក់ស្តែងនៅខែឧសភា ធនាគារជាតិកាណាដា បានក្លាយជាភាគទុនិកធំបំផុតរបស់ធនាគារ ABA ដែលមានភាគហ៊ុន 90%។ ការសហរការណ៍នេះបានធ្វើឲ្យមូលធនរបស់ធនាគារ ABA មានការកើនឡើងខ្ពស់ និងផ្ដល់ការគាំទ្របន្ថែមដល់សន្ទុះនៃការអភិវឌ្ឍន៍ ហើយក៏ផ្តល់បន្ថែមឲ្យធនាគារ ABA នូវជំនាញដ៏ជាក់លាក់។ ភាពជាដៃគូនេះបានផ្តល់លទ្ធភាពអោយធនាគារអាចផ្តល់រាប់ពាន់កម្ចី ដល់អាជីវកម្មខ្នាតតូច សហគ្រាសខ្នាតតូច និងមធ្យម ព្រមទាំងបានជំរុញឲ្យមានការរីកចម្រើនផ្នែកសេដ្ឋកិច្ច និងភាពសុខដុមរមនារបស់ប្រជាពលរដ្ឋកម្ពុជា។ ជាលទ្ធផលចំនួនគណនីសន្សំរបស់ធនាគារ ABA បានកើនឡើងពី 85,000គណនី នាចុងឆ្នាំ 2015 ដល់ 155,000គណនី គិតត្រឹមថ្ងៃទី01 ខែធ្នូ ឆ្នាំ2016។ ការរីកចម្រើននេះជាសង្ខីភាពបញ្ជាក់ថាធនាគារ ABA ជាធនាគារដែលមានសក្កានុពលខ្លាំងនិងទទួលបានការគាំទ្រយ៉ាងច្រើនពីអតិថិជន។
ធនាគារ ABA ទទួលជ័យលាភីជា “ធនាគារឆ្នើមបំផុតប្រចាំឆ្នាំ 2016“ ពីទស្សនាវដ្ដីហិរញ្ញវត្ថុ The Banker ដូចគ្នានឹងពានរង្វាន់ដែលធ្លាប់ឈ្នះកាលពីឆ្នាំ2014។ បន្ថែមពីលើនេះធនាគារ ABA បានឈ្នះពានរង្វាន់ពីទស្សនាវដ្តីហិរញ្ញវត្ថុ Euromoney ដែលឧទ្ទេសនាមធនាគារ ABA ជា “ធនាគារដ៏ឆ្នើមក្នុងប្រទេសកម្ពុជា” រយៈពេល 3ឆ្នាំ ជាប់ៗគ្នា ហើយយើងក៏ទទួលបាននាមជា “ធនាគារដ៏ឆ្នើមបំផុតក្នុងប្រទេសកម្ពុជា” ពី ទស្សនាវដ្តីហិរញ្ញវត្ថុ Global Finance ក្នុងឆ្នាំ 2015 និង2016 ផងដែរ។
