ធនាគារ ABA ផ្តល់ការទូទាត់បែបឌីជីថល សម្រាប់សេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ
18/Jan/2021
ធនាគារ ABA និងក្រសួងការងារ និងបណ្តុះបណ្តាលវិជ្ជាជីវៈ សហការគ្នាផ្តល់ការទូទាត់បែបឌីជីថលដ៏ងាយស្រួលសម្រាប់សេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ តាមរយៈកម្មវិធីទូរស័ព្ទដៃរបស់ធនាគារ និងប្រព័ន្ធសេវាធនាគារអនឡាញសម្រាប់អាជីវកម្ម។
តាមរយៈកិច្ចសហការ អតិថិជន ABA ឥឡូវនេះ អាចបង់ថ្លៃសេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ ដោយឥតគិតថ្លៃ និងក្នុងពេលវេលាជាក់ស្តែងបានពីគ្រប់ទីកន្លែង។
សេវាសំខាន់ៗរបស់ក្រសួងការងារ និងបណ្តុះបណ្តាលវិជ្ជាជីវៈ មានដូចជា
- ការចុះបញ្ជិកាសេចក្តីប្រកាសជូនដំណឹងបើកសហគ្រាស
- ការចុះបញ្ជិកាសៀវភៅបើកប្រាក់របស់សហគ្រាស
- ការចេញលិខិតទទួលស្គាល់ការបោះឆ្នោតជ្រើសរើសប្រតិភូបុគ្គលិក
- ការបញ្ជាក់វិញ្ញាបនបត្រពិនិត្យកាយសម្បទាកម្មករនិយោជិតខ្មែរ
- ការផ្តល់សៀវភៅការងារ និងប័ណ្ណសម្គាល់កម្មករនិយោជិតខ្មែរ។
បញ្ជីឈ្មោះពេញលេញនៃសេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ មាននៅត្រង់នេះ។
លោក ម៉ី ប៉ូលីន នាយកអភិវឌ្ឍន៍អាជីវកម្មរបស់ធនាគារ ABA មានប្រសាសន៍ថា៖ “ការផ្តល់ជូនប្រព័ន្ធសេវាធនាគារឌីជីថលដ៏មានប្រសិទ្ធភាព សុវត្ថិភាព និងទំនើប ដូចជា កម្មវិធី ABA Mobile និងសេវាធនាគារអនឡាញសម្រាប់អាជីវកម្ម ដើម្បីលើកកម្ពស់សេដ្ឋកិច្ចបែបឌីជីថលជាអាទិភាពមួយក្នុងចំណោមអាទិភាពចម្បងៗរបស់ធនាគារ។ បន្ទាប់ពីបានសហការដោយជោគជ័យជាមួយក្រសួងសាធារណការ និងដឹកជញ្ជូន កាលពីឆ្នាំមុនរួចមក ការសហការជាមួយក្រសួងការងារ និងបណ្តុះបណ្តាលវិជ្ជាជីវៈ បង្ហាញបន្ថែមនូវការប្តេជ្ញាចិត្តរបស់យើងក្នុងការជំរុញការទូទាត់បែបឌីជីថល និងសេវាធនាគារទំនើបសម្រាប់ប្រជាពលរដ្ឋកម្ពុជា។ យើងជឿជាក់ថា កិច្ចសហការនេះនឹងអនុញ្ញាតឲ្យអ្នកប្រើប្រាស់អាចទូទាត់ថ្លៃសេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ យ៉ាងងាយស្រួល ដោយចំណេញពេលវេលា និងកម្លាំង”។
ឯកឧត្តម ហេង សួរ រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា៖ "គោលបំណងនៃកិច្ចសហការនេះ គឺធ្វើឱ្យមានភាពងាយស្រួលទៅដល់សាធារណជនក្នុងការមកទទួលសេវាសាធារណៈ ដោយអាចធ្វើទូទាត់ថ្លៃសេវាសាធារណៈបានគ្រប់ពេលវេលា គ្រប់ទីកន្លែង និងចំណេញពេលវេលា។ បន្ថែមលើនេះ គឺបង្កើនភាពងាយស្រួល សុវត្ថិភាព និងឆាប់រហ័ស ដើម្បីធានាគុណភាព ប្រសិទ្ធភាព តម្លាភាព និងគណនេយ្យភាពនៃសេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ ជាពិសេសលើកកម្ពស់ការប្រើប្រាស់ប្រព័ន្ធបច្ចេកវិទ្យាព័ត៌មាននាសម័យឧស្សាហកម្ម 4.0”។
សម្រាប់ព័ត៌មានបន្ថែមអំពីសេវាកម្មដែលផ្តល់ដោយធនាគារ ABA និងក្រសួងការងារ និងបណ្តុះបណ្តាលវិជ្ជាជីវៈ សូមទាក់ទងមកធនាគារ ABA តាមទូរស័ព្ទលេខ 023 225 333 ឬក្រសួងការងារ និងបណ្តុះបណ្តាលវិជ្ជាជីវៈ តាមទូរស័ព្ទលេខ 1297។
សូមចូលទៅកាន់ទំព័រ កម្មវិធី ABA Mobile ដើម្បីដឹងបន្ថែមអំពីកម្មវិធីសេវាធនាគារតាមទូរស័ព្ទដៃ។ ព័ត៌មានបន្ថែមអំពីសេវាធនាគារអនឡាញសម្រាប់អាជីវកម្ម មាននៅទំព័រ សេវាធនាគារអនឡាញសម្រាប់អាជីវកម្ម។
អ្នកអាចដោនឡូតកម្មវិធី ABA Mobile ពី app store របស់ទូរស័ព្ទដៃរបស់អ្នក ដូចខាងក្រោម៖
