សាខា ABA ដំបូងនៅឧត្តរមានជ័យ ត្រូវបានបើកជាផ្លូវការ
17/Jan/2022
ជាផ្នែកមួយនៃការបន្តពង្រីកបណ្ដាញសាខារបស់ខ្លួន ធនាគារ ABA ស្វាគមន៍សាខាដំបូងនៅឧត្តរមានជ័យ ជាខេត្តដែលស្ថិតនៅទិសពាយព្យនៃប្រទេសកម្ពុជា។ សាខាដែលបម្រើសេវាកម្មពេញលេញនេះ មានគោលបំណងនាំយកនូវផលិតផល និងសេវាធនាគារទំនើបជូនដល់អតិថិជនកាន់តែច្រើន រួមមានការបើកនិងរក្សាគណនី, ការផ្ដល់ជូនកម្ចីអាជីវកម្ម, ការចេញកាតទូទាត់, ការផ្ទេរប្រាក់, ការចេញមូលប្បទានបត្រ និងសេវាសំខាន់ៗជាច្រើនទៀត។
ដោយមានទីតាំងស្ថិតនៅក្នុងក្រុងសំរោង សាខាឧត្តរមានជ័យ មានចំណតធំទូលាយ បញ្ជរបម្រើសេវា និងកន្លែងរង់ចាំប្រកបដោយផាសុកភាព។ ឧបករណ៍ និងបរិក្ខារស្វ័យសេវា ដូចជា ATM, ម៉ាស៊ីនដាក់ប្រាក់, និងម៉ាស៊ីនដាក់/ដកប្រាក់ ក៏ត្រូវបានដាក់ជូនផងដែរ ដើម្បីសម្រួលដល់ការចូលប្រើប្រាស់របស់អតិថិជន។
លោក ឆុម សុខុម ប្រធានសាខាខេត្តឧត្តរមានជ័យបានមានប្រសាសន៍ថា “ខេត្តឧត្តរមានជ័យដែលស្ថិតនៅកៀកប្រទេសថៃ នាំមកនូវឱកាសពាណិជ្ជកម្ម និងសេដ្ឋកិច្ច ដូច្នេះ ទើបមានតម្រូវការច្រើន លើសេវាហិរញ្ញវត្ថុទំនើបពីសំណាក់ប្រជាពលរដ្ឋនៅក្នុងខេត្តនេះ។ បន្ថែមលើនេះទៀត ខេត្តនេះ គ្របដណ្ដប់ដោយសកម្មភាពផលិតកម្មផ្នែកកសិកម្ម។ ហេតុនេះហើយ ទើប ABA សម្រេចចិត្តបើកសាខានៅទីនេះ ហើយយើងខ្ញុំមានសេចក្ដីសោមនស្សរីករាយក្នុងការផ្ដល់សេវាធនាគារទំនើប និងគួរជាទីទុកចិត្តដល់អតិថិជនជាបុគ្គល និងអាជីវកម្ម”។
ចាប់ពីថ្ងៃនេះតទៅ អតិថិជនអាចអញ្ជើញមកកាន់សាខាថ្មីនេះ ដើម្បីបំពេញតម្រូវការសេវាធនាគារ និងប្រឹក្សាយោបល់ជាមួយបុគ្គលិកប្រកបដោយវិជ្ជាជីវៈរបស់យើង ចាប់ពីថ្ងៃចន្ទ ដល់សុក្រ នៅរៀងរាល់ម៉ោង 8ព្រឹក ដល់ 4រសៀល។
សាខា ABA ឧត្តរមានជ័យ មានអាសយដ្ឋានស្ថិតនៅអគារលេខ 68 ភូមិដូនកែន សង្កាត់សំរោង ក្រុងសំរោង (មើលផែនទី)។ ដើម្បីទាក់ទងមកកាន់សាខា សូមទូរស័ព្ទមកលេខ 081 204 693។
គិតមកដល់ថ្ងៃនេះ ABA ធ្វើប្រតិបត្តិការសរុប 81សាខា និង ស្វ័យសេវា ABA 24/7 ចំនួន 14ទីតាំង ជាមួយម៉ាស៊ីនស្វ័យសេវាជាង 810 ទូទាំងប្រទេស។
