គំនិតផ្ដួចផ្ដើម សាជីវកម្មមានទំនួលខុសត្រូវសង្គមរបស់ ABA ត្រូវបានសាទរដោយពានរង្វាន់ យុទ្ធនាការទីផ្សារប្រចាំឆ្នាំ និងមាតិកាទីផ្សារប្រចាំឆ្នាំ
21/Dec/2023
ABA ដែលជាធនាគារពាណិជ្ជធំបំផុតនៅកម្ពុជា បានឈ្នះពានរង្វាន់ យុទ្ធនាការទីផ្សារប្រចាំឆ្នាំ សម្រាប់គំនិតផ្ដួចផ្ដើមផ្សព្វផ្សាយព្រឹត្តិការណ៍ស៊ីហ្គេម 2023 និងពានរង្វាន់មាតិកាទីផ្សារ សម្រាប់យុទ្ធនាការផ្សព្វផ្សាយ សារជូនដំណឹងពីការបោកបញ្ឆោត នៅក្នុងកម្មវិធី ពានរង្វាន់ឧត្តមភាពទីផ្សារសកល ដែលរៀបចំឡើងដោយ CMO Asia។
ការទទួលស្គាល់ផ្ទួនៗនេះ គឺជាសក្ខីភាពបញ្ជាក់ពីការប្ដេជ្ញាចិត្តរបស់ធនាគារ ABA ក្នុងការជំរុញសហគមន៍ឲ្យមានភាពរស់រវើក និងសាទរកេរដំណែលដែលជាមរតករួមរបស់ប្រទេសកម្ពុជា លើសពីការផ្ដល់សេវាធនាគារតែមួយមុខ។
ជ័យជម្នះដ៏មោទនៈ ៖ ភាពជោគជ័យនៃព្រឹត្តិការណ៍ស៊ីហ្គេម សម្រាប់ ABA
ភាពជាដៃគូឧបត្ថម្ភផ្ដាច់មុខរបស់ធនាគារ សម្រាប់ព្រឹត្តិការណ៍ស៊ីហ្គេមលើកទី 32 និងអាស៊ានប៉ារ៉ាហ្គេមលើកទី 12 បានបង្ហាញពីការយកចិត្តទុកដាក់របស់ ABA ចំពោះស្មារតីកីឡា។ វាក៏បានបង្ហាញពីយុទ្ធសាស្ដ្រទីផ្សារ ដែលទាញអារម្មណ៍អតិថិជនឲ្យដក់ជាប់ក្នុងការចងចាំ។ គំនិតផ្ដួចផ្ដើមនេះ បានបញ្ចេញនូវមាតិកា និងការផ្សព្វផ្សាយដ៏ទាក់ទាញ ដោយបានរំលេចនូវដំណើររបស់អត្តពលិកកម្ពុជា ដែលបង្កើននូវទំនាក់ទំនង និងចាក់ដោតអារម្មណ៍របស់ទស្សនិកជនទៅនឹងមាតិកាទាំងនោះ។ យុទ្ធនាការផ្សព្វផ្សាយនេះ បានឈានទៅកម្រិតថ្មីមួយទៀត តាមរយៈការបង្កើត(កាតរចនាពិសេសសម្រាប់ស៊ីហ្គេម 2023) ដែលលទ្ធផល ទទួលបានកំណើន 39% សម្រាប់ផ្នែកបើកកាត។
ក្រៅពីកាតទូទាត់ ABA បានផលិត (វីដេអូបំផុសគំនិតសម្រាប់ស៊ីហ្គេម 2023) ដើម្បីអបអរ និងលើកទឹកចិត្តដល់អត្តពលិកកម្ពុជា ព្រមទាំងពង្រឹងចំណងជិតស្និទ្ធ រវាងធនាគារ អតិថិជន និងអត្តពលិកដែលពួកគេគាំទ្រដោយមោទនភាព។ វិធីសាស្ត្រចម្រុះនេះ ទទួលបានកំណើន 15% សម្រាប់ផ្នែក បើកគណនីរហ័ស អំឡុងពេលផ្សព្វផ្សាយស៊ីហ្គេមឆ្នាំ 2023 ដែលជាជំហានជោគជ័យដ៏សំខាន់នៅក្នុងទីផ្សារ។
ការប្រុងប្រយ័ត្នផ្នែកឌីជីថល៖ កិច្ចការផ្សព្វផ្សាយ អំពីការជូនដំណឹងពីការបោកបញ្ឆោតរបស់ ABA
ពានរង្វាន់ទី 2 មាតិកាទីផ្សារប្រចាំឆ្នាំ ផ្ដោតលើសារគន្លឹះសំខាន់ៗនៃការការពារទិន្នន័យផ្ទាល់ខ្លួន។ បេសកកម្មស្នូលរបស់យុទ្ធនាការផ្សព្វផ្សាយនេះ ត្រូវបានធ្វើឡើងដើម្បីពន្យល់/ណែនាំ អតិថិជន និងប្រជាពលរដ្ឋគ្រប់រូបអំពី (ការរក្សាព័ត៌មានផ្ទាល់ខ្លួន និងព័ត៌មានគណនីធនាគារ) ដែលផ្ដោតសំខាន់លើគោលការណ៍ មិនចែករំលែកព័ត៌មានណាមួយជាមួយអ្នកណាម្នាក់ ទោះក្នុងកាលៈទេសៈណាក៏ដោយ។
គោលការណ៍ទាំងនេះ ដើរតួជាការក្រើនរំលឹកចំពោះហានិភ័យដែលអាចកើតមានឡើង ដើម្បីបង្កើនការប្រុងប្រយ័ត្នក្នុងការផ្ញើប្រាក់ឌីជីថល។ លើសពីការអប់រំ ABA មានបំណងពង្រឹងសមត្ថភាពរបស់អតិថិជនគ្រប់រូប ជាមួយនឹងចំណេះដឹង និងជំនាញចាំបាច់ ដែលមានភាពជាក់ស្ដែង ក្នុងការកំណត់សម្គាល់ និងឆ្លើយតបទៅនឹងការបោកបញ្ឆោតប្រកបដោយប្រសិទ្ធភាព។
លោក Igor Zimarev នាយកទីផ្សារ និងកិច្ចការ CSR របស់ធនាគារ ABA បានអធិប្បាយនាឱកាសនោះថា “ការទទួលស្គាល់នេះ គូសបញ្ជាក់ពីការប្ដេជ្ញាចិត្តរបស់យើងខ្ញុំ ក្នុងការលើកកម្ពស់សហគមន៍ និងមោទនភាពជាតិ ព្រមទាំងពង្រឹងការដឹកនាំរបស់យើង ក្នុងការសន្យាការពារអតិថិជនពីការបោកបញ្ឆោតតាមអនឡាញ នៅក្នុងសម័យទំនើបនេះ”។
លោកបណ្ឌិត Aalok Pandit អភិបាលប្រតិបត្តិរបស់ CMO Asia បានអបអរសាទរ ABA សម្រាប់យុទ្ធសាស្ដ្រទីផ្សារដ៏ល្អឯក និងការប្ដេជ្ញាចិត្តចំពោះកិច្ចការទំនួលខុសត្រូវសង្គម។ លោកបណ្ឌិតបានមានប្រសាសន៍ថា “យុទ្ធនាការផ្សព្វផ្សាយព្រឹត្តិការណ៍ស៊ីហ្គេម 2023 របស់ធនាគារ ABA បានទាញចំណាប់អារម្មណ៍របស់ទស្សនិកជនមកពីគ្រប់មជ្ឈដ្ឋានប្រកបដោយភាពច្នៃ ប្រឌិត ដែលបង្ហាញនូវអនុភាពរួមនៃកីឡា នៅក្នុងការផ្សព្វផ្សាយរបស់ម៉ាកយីហោក្រុមហ៊ុន។ ស្រដៀងគ្នានេះដែរ យុទ្ធនាការផ្សព្វផ្សាយរបស់ធនាគារប្រឆាំងនឹងការបោកបញ្ឆោតតាមអនឡាញ បានបញ្ជាក់ពីការយកចិត្តទុកដាក់របស់ធនាគារចំពោះទំនួលខុសត្រូវសង្គម ក៏ដូចជាសុខុមាលភាពរបស់អតិថិជន”។
លោកបានបន្ថែមថា “ពានរង្វាន់ទាំងនេះ ទទួលស្គាល់ពីកិច្ចខិតខំប្រឹងប្រែងគួរឲ្យកត់សម្គាល់របស់ធនាគារ ABA ក្នុងការពង្រឹងសុវត្ថិភាពឌីជីថល និងចំណេះដឹងហិរញ្ញវត្ថុនៅកម្ពុជា។ ការយល់ដឹងរបស់ពួកគេយ៉ាងស៊ីជម្រៅអំពីអតិថិជន និងការប្ដេជ្ញាចិត្តចំពោះសហគមន៍ដែលពួកគេធ្វើប្រតិបត្តិការធុរកិច្ច គឺពិតជាគួរឲ្យស្ញប់ស្ញែង”។
