ABA ឧបត្ថម្ភពិធីបដិសណ្ឋារកិច្ច ទំនាក់ទំនងធុរកិច្ចកាណាដា-កម្ពុជា នៅខេត្តសៀមរាប
22/Sep/2022
ABA ដែលជាធនាគារពាណិជ្ជធំជាងគេនៅកម្ពុជា1 និងជាបុត្រសម្ពន្ធធនាគារជាតិកាណាដា បានក្លាយជាអ្នកឧបត្ថម្ភពិធីបដិសណ្ឋារកិច្ចទំនាក់ទំនងធុរកិច្ចកាណាដា-កម្ពុជា ដែលរៀបចំដោយ ក្រុមប្រឹក្សាធុរកិច្ចកាណាដា-កម្ពុជា (Canada-ASEAN Business Council ហៅកាត់ថា CABC) កាលពីថ្ងៃទី17 ខែកញ្ញា ឆ្នាំ2022។ ពិធីបដិសណ្ឋារកិច្ចនេះ ត្រូវបានធ្វើឡើងជាផ្នែកមួយបន្ទាប់ពីកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី54 និងកិច្ចប្រជុំពាក់ព័ន្ធ ក្នុងខេត្តសៀមរាប។
ពិធីនេះ មានវត្តមានចូលរួមពីលោកស្រី Mary Ng រដ្ឋមន្ត្រីពាណិជ្ជកម្មអន្តរជាតិ ជំរុញការនាំចេញ ការអភិវឌ្ឍសេដ្ឋកិច្ច និងធុរកិច្ចធុនតូចនៃកាណាដា, លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នៃកម្ពុជា, ភ្ញៀវកិត្តិយស និងតំណាងធុរកិច្ចជាច្រើនទៀត។
ពិធីបដិសណ្ឋារកិច្ចនេះ បានជួយសម្របសម្រួលដល់ទំនាក់ទំនងថ្មីៗ និងផ្ដល់មូលដ្ឋានសម្រាប់ភាពជាដៃគូបន្ថែមទៀត រវាងកាណាដា កម្ពុជា និងអាស៊ានទាំងមូល។
អំឡុងពិធីនេះ លោក Zokhir Rasulov នាយកឌីជីថល នៅធនាគារ ABA បានថ្លែងពីការរួមចំណែកសំខាន់ៗរបស់ ធនាគារ ABA នៅក្នុងវឌ្ឍនភាពសេវាធនាគារឌីជីថល និងបរិយាបន្នហិរញ្ញវត្ថុនៅកម្ពុជា ដែលជាផ្នែកនៃសម្ពន្ធធនាគារជាតិកាណាដា។
1 ABA ជាធនាគារពាណិជ្ជធំជាងគេនៅកម្ពុជា ផ្អែកលើទ្រព្យសក្មសរុប ឥណទានដុល បញ្ញើអតិថិជន និងប្រាក់ចំណេញ យោងតាមរបាយការណ៍ត្រួតពិនិត្យប្រចាំឆ្នាំ2011 របស់ធនាគារជាតិនៃកម្ពុជា។
