ធនាគារ ABA គាំទ្រកម្មវិធីធុរកិច្ចថ្មី និងនវានុវត្តន៍ ឆ្នាំ 2023
13/Apr/2023
ABA ដែលជាធនាគារពាណិជ្ជឈានមុខគេនៅកម្ពុជា បានធ្វើជាអ្នកឧបត្ថម្ភធំ នៃកម្មវិធីធុរកិច្ចថ្មី និងនវានុវត្តន៍ (Start-Up & Innovation Festival) ឆ្នាំ 2023 ដែលសហការរៀបចំជាលើកដំបូង ដោយ Rising Grants និង Cambodia Investment Review នៅឯ FACTORY ភ្នំពេញ នាថ្ងៃទី 8 ខែមេសា ឆ្នាំ 2023។
ក្នុងកម្មវិធីនេះ មានអ្នកចូលរួមសកម្មជាង 300 នាក់ ដែលបានចូលរួមបង្ហាញពីវឌ្ឍនភាព និងការផ្លាស់ប្តូរប្រព័ន្ធអេកូឡូស៊ី របស់ធុរកិច្ចថ្មីនៅកម្ពុជា។
លោក Igor Zimarev នាយកទីផ្សារ និងកិច្ចការទំនួលខុសត្រូវសង្គម និងជាលេខាធិការសាជីវកម្មរបស់ ABA បានមានប្រសាសន៍ថា "យើងមានមោទនភាព ដោយបានឧបត្ថម្ភកម្មវិធីដែលទើបតែត្រូវបានរៀបចំជាលើកទី 1 នេះ។ កម្មវិធីនេះបានផ្តល់ឱកាសដ៏ប្រពៃ សម្រាប់នវានុវត្តជន (innovator) វ័យក្មេង ដើម្បីបង្ហាញពីគំនិតរបស់ពួកគេ និងភ្ជាប់ទំនាក់ទំនងជាមួយអ្នកជំនាញ និងអ្នកវិនិយោគនៅក្នុងប្រព័ន្ធអេកូឡូស៊ីនៃធុរកិច្ចថ្មី" ។
លោកបានបន្ថែមថា “ក្នុងនាមជាអ្នកឧបត្ថម្ភធំ យើងខ្ញុំប្តេជ្ញាផ្តល់សេវាហិរញ្ញវត្ថុ និងបច្ចេកទេសចាំបាច់ ដើម្បីជំរុញនវានុវត្តន៍ និងសហគ្រិនភាពនៅកម្ពុជា”។
ក្នុងនាមជាគ្រឹះស្ថានហិរញ្ញវត្ថុឈានមុខគេ ធនាគារ ABA បានចូលរួមចំណែកយ៉ាងសំខាន់ ក្នុងការអភិវឌ្ឍសហគ្រាសបច្ចេកវិទ្យា និងធុរកិច្ចថ្មីនៅកម្ពុជា។
ប៉ុន្មានឆ្នាំមកនេះ ABA បានគាំទ្រកម្មវិធីលើកកម្ពស់ធុរកិច្ចថ្មីជាច្រើន ដែលផ្តួចផ្តើមឡើងដោយក្រសួង និងដៃគូនានា ដើម្បីផ្តល់លទ្ធភាពដល់សហគ្រិនវ័យក្មេង នូវដើមទុនសម្រាប់ធ្វើកំណែទម្រង់ធុរកិច្ច, កម្មវិធីអភិវឌ្ឍន៍ និងប្រឹក្សាយោបល់, និងហេដ្ឋារចនាសម្ព័ន្ធបច្ចេកវិទ្យា ដើម្បីពង្រីកអាជីវកម្មរបស់ពួកគាត់៕