ធនាគារ ABA ចូលរួមគាំទ្រកម្មវិធី បច្ចេកវិទ្យាហិរញ្ញវត្ថុកម្ពុជា
02/Oct/2019
ក្នុងការចូលរួមអភិវឌ្ឍបច្ចេកវិទ្យាហិរញ្ញវត្ថុនៅក្នុងប្រទេសកម្ពុជា ធនាគារ ABA មានមោទនៈភាពក្នុងការធ្វើជាម្ចាស់ឧបត្ថម្ភក្នុងកម្មវិធី បច្ចេកវិទ្យាហិរញ្ញវត្ថុកម្ពុជា ដែលប្រព្រឹត្តិទៅនៅសណ្ឋាគារ Raffles Hotel Le Royal ក្នុងទីក្រុងភ្នំពេញ នៅពីថ្ងៃទី 2 ខែតុលា ឆ្នាំ2019។
រៀបចំដោយធនាគាជាតិនៃកម្ពុជា ក្រោមកិច្ចសហការជាមួយធនាគារអភិវឌ្ឍអាស៊ី (ADB) តាមរយៈគំនិតផ្តួចផ្តើមធុរកិច្ចមេគង្គ (Mekong Business Initiative) និងស្ថានទូតអូស្ត្រាលីប្រចាំនៅកម្ពុជា កម្មវិធីនេះមានគោលបំណងបង្កើតឱកាសដល់តំណាងរដ្ឋាភិបាល អ្នករៀបចំគោលនយោបាយ អាជ្ញាធរ និងភាគីពាក់ព័ន្ធទាំងអស់ ពិភាក្សាគ្នាអំពីការកើនឡើងនៃតួនាទីបច្ចេកវិទ្យាហិរញ្ញវត្ថុ ក្នុងការចូលរួមចំណែកអភិវឌ្ឍវិស័យហិរញ្ញវត្ថុ និងសេដ្ឋកិច្ចនៅកម្ពុជា។ កម្មវិធីនេះ ក៏ផ្តល់ជាវេទិកាដល់ភាគីពាក់ព័ន្ធ ដើម្បីចែករំលែកចំណេះដឹងទាក់ទងនឹងការអភិវឌ្ឍថ្មីរបស់បច្ចេកវិទ្យាហិរញ្ញវត្ថុនៅក្នុងស្ថាប័ន និងដែនសមត្ថកិច្ចរបស់ខ្លួនផងដែរ។
ព្រឹត្តិការណ៍បានទាក់ទាញអ្នកចូលរួមប្រមាណ 300 នាក់មកពីធនាគារជាតិនៃកម្ពុជា អ្នកតំណាងក្រសួង-ស្ថាប័នពាក់ព័ន្ធ តំណាងធនាគារកណ្តាលថៃ ធនាគារកណ្តាលកូរ៉េ និងអាជ្ញាធររូបិយវត្ថុសិង្ហបុរី គ្រឹះស្ថានធនាគារនិងហិរញ្ញវត្ថុ និងក្រុមហ៊ុនបច្ចេកវិទ្យាហិរញ្ញវត្ថុសំខាន់ៗនៅក្នុងតំបន់។
ព័ត៌មាន និងចំណេះដឹងដែលទទួលបានពីការពិភាក្សាក្នុងកម្មវិធីនេះ នឹងត្រូវបានប្រើប្រាស់ដោយអ្នករៀបចំគោលនយោបាយ និងអាជ្ញាធរពាក់ព័ន្ធ ក្នុងការស្វែងយល់ឲ្យកាន់តែច្បាស់អំពីស្ថានភាពបច្ចេកវិទ្យាហិរញ្ញវត្ថុនៅកម្ពុជា និងក្នុងពិភពលោក និងដើម្បីរៀបចំគោលនយោបាយ និងបទប្បញ្ញត្តិឲ្យបានកាន់តែប្រសើរ ក្នុងការគាំទ្រការរីកចំរើនផ្នែកបច្ចេកវិទ្យាហិរញ្ញវត្ថុនៅក្នុងប្រទេសកម្ពុជា។