ABA ជាអ្នកឧបត្ថម្ភធំនៃវេទិកាបច្ចេកវិទ្យាហិរញ្ញវត្ថុកម្ពុជា ឆ្នាំ2023 ដើម្បីបង្ហាញការប្ដេជ្ញាចិត្តរបស់ខ្លួន ចំពោះវឌ្ឍនភាពសេវាធនាគារឌីជីថល
01/Dec/2023
ABA ដែលជាធនាគារពាណិជ្ជធំបំផុតមួយនៅកម្ពុជា មានមោទនភាពក្នុងការធ្វើជាអ្នកឧបត្ថម្ភធំ (Gold Sponsor) នៃវេទិកាបច្ចេកវិទ្យាហិរញ្ញវត្ថុកម្ពុជា ឆ្នាំ2023 ដើម្បីបង្ហាញពីការយកចិត្តទុកដាក់របស់ខ្លួន ចំពោះវឌ្ឍនភាពសេវាធនាគារឌីជីថល និងជំរុញនវានុវត្តន៍ក្នុងវិស័យឯកជន។ វេទិកានេះបានប្រព្រឹត្តទៅកាលពីថ្ងៃទី 29 និង 30 ខែវិច្ឆិកា ឆ្នាំ2023 នៅមណ្ឌលសិក្សាបច្ចេកទេសធនាគារ រាជធានីភ្នំពេញ។
វេទិកានេះត្រូវបានរៀបចំឡើង ក្រោមទស្សនាទាន “ការបង្កើតទំនាក់ទំនង៖ ជំរុញកិច្ចសហប្រតិបត្តិការ និងនវានុវត្តន៍សេវាហិរញ្ញវត្ថុឌីជីថល ក្នុងតំបន់មេគង្គ និងតំបន់ផ្សេងៗ” និងមានគោលបំណងផ្តល់ឱកាសដល់ប្បញ្ញត្តិករ អ្នករៀបចំគោលនយោបាយ ជំនាញការ និងភាគីពាក់ព័ន្ធ សិក្សា ព្រមទាំងចែករំលែកចំណេះដឹង បទពិសោធ និងឧត្តមានុភាពស្តីពី ការរីកចម្រើននៃវិស័យបច្ចេកវិទ្យានៅក្នុងប្រទេសកម្ពុជា។
លោកជំទាវបណ្ឌិត ជា សេរី អគ្គទេសាភិបាលនៃធនាគារជាតិនៃកម្ពុជា បានថ្លែងសុន្ទរកថាដ៏មានអត្ថន័យ ដោយគូសបញ្ជាក់ពីតួនាទីដ៏សំខាន់របស់វិស័យបច្ចេកវិទ្យាហិរញ្ញវត្ថុ ក្នុងការជំរុញឲ្យមានបរិយាបន្នហិរញ្ញវត្ថុរបស់កម្ពុជា។ ធនាគារ ABA មានសេចក្ដីសោមនស្សយ៉ាងខ្លាំង ចំពោះវេទិកាដ៏មានសារៈសំខាន់មួយនេះ ដែលបង្ហាញពីកិច្ចសហការរួមគ្នារវាងវិស័យរដ្ឋ និងឯកជន។
វេទិកានេះ បានបង្ហាញពីគំនិតផ្តួចផ្តើមឲ្យមានការទូទាត់ឌីជីថល ដោយផ្តោតជាពិសេស លើភាពជោគជ័យដ៏លេចធ្លោរបស់ បាគង ដែលស្របតាមការប្តេជ្ញាចិត្តផ្ទាល់របស់ធនាគារ ABA ក្នុងការជំរុញនវានុវត្តន៍ឌីជីថល នៅក្នុងវិស័យធនាគារកម្ពុជា។
ថ្លែងក្នុងសន្និសីទសារព័ត៌មាន និងកិច្ចពិភាក្សានៅឯវេទិកា លោក Zokhir Rasulov នាយកឌីជីថលនៃធនាគារ ABA បានបញ្ជាក់ជាថ្មី ចំពោះកិច្ចខិតខំប្រឹងប្រែងឥតរាករេរបស់ធនាគារ ក្នុងការជំរុញនវានុវត្តន៍បច្ចេកវិទ្យាហិរញ្ញវត្ថុ ក្នុងវិស័យធនាគារនៅកម្ពុជា ក៏ដូចជាគូសបញ្ជាក់ពីការផ្សារភ្ជាប់របស់ធនគារ ទៅនឹងគំនិតផ្តួចផ្តើមនៃយុទ្ធសាស្ត្រទាំងឡាយណា ដែលជំរុញឲ្យមានបរិយាបន្នហិរញ្ញវត្ថុរបស់ធនាគារជាតិនៃកម្ពុជា។ លោកបានបន្ថែមថា “ខណៈដែលយើងបានឃើញពីទិដ្ឋភាពវិវត្តន៍នៃបច្ចេកវិទ្យាហិរញ្ញវត្ថុ ធនាគារ ABA នៅតែប្រកាន់ខ្ជាប់នូវបេសកកម្មរបស់ខ្លួន ក្នុងការត្រួសត្រាយនវានុវត្តន៍ និងពង្រឹងបទពិសោធក្នុងការផ្តល់សេវាធនាគារឌីជីថលនៅកម្ពុជា។
លោកបានបន្ថែមថា “ខណៈដែលយើងបានឃើញពីទិដ្ឋភាពវិវត្តន៍នៃបច្ចេកវិទ្យាហិរញ្ញវត្ថុ ធនាគារ ABA នៅតែប្រកាន់ខ្ជាប់នូវបេសកកម្មរបស់ខ្លួន ក្នុងការត្រួសត្រាយនវានុវត្តន៍ និងពង្រឹងបទពិសោធក្នុងការផ្តល់សេវាធនាគារឌីជីថលនៅកម្ពុជា។” លោកបានបន្ថែមថា “វេទិកានេះ មិនត្រឹមតែជាវេទិកា សម្រាប់បង្ហាញពីការប្តេជ្ញាចិត្តរបស់យើងប៉ុណ្ណោះទេ ប៉ុន្តែក៏ជាវេទិកាប្រកបដោយថាមពលជំរុញដល់កិច្ចសហការប្រកបដោយអត្ថន័យ ក្នុងចំណោមភាគីពាក់ព័ន្ធសំខាន់ៗក្នុងវិស័យហិរញ្ញវត្ថុ។ យើងជឿជាក់ថាកិច្ចសហការនេះនឹងរួមចំណែកក្នុងការកំណត់អនាគត នៃបច្ចេកវិទ្យាហិរញ្ញវត្ថុនៅថ្នាក់តំបន់របស់កម្ពុជាយើងផងដែរ”៕