ធនាគារ ABA ឥឡូវ ដំណើរការជាមួយ KHQR សម្រាប់ភាពងាយស្រួលដ៏ប្រសើរនៃសេវាទូទាត់ QR របស់ខ្លួន
09/Mar/2022
ធនាគារ ABA ដែលជាធនាគារពាណិជ្ជឈានមុខរបស់កម្ពុជាក្នុងវិស័យហិរញ្ញវត្ថុឌីជីថល សូមប្រកាសថា KHQR ដែលជាគំនិតផ្ដួចផ្ដើមរបស់ធនាគារជាតិនៃកម្ពុជា សំដៅលើកកម្ពស់ការប្រើប្រាស់កាន់តែទូលំទូលាយនៃសេវាទូទាត់ តាមទូរស័ព្ទ ឥឡូវនេះដំណើរការពេញលេញក្នុងប្រព័ន្ធទូទាត់ ABA PAY យើងខ្ញុំហើយ។
តាមរយៈការអភិវឌ្ឍនេះ អ្នកប្រើកម្មវិធីធនាគារតាមទូរស័ព្ទរបស់សមាជិកបាគងទាំងអស់នឹងអាចទូទាត់ដោយស្គែន កូដ QR ABA PAY ជាមួយអាជីវករ ABA ជាង 150,000 ទូទាំងប្រទេស។ សេវាទូទាត់ KHQR ក្នុង ABA PAY មានគោលបំណងនាំយកភាពងាយស្រួលកាន់តែប្រសើរសម្រាប់ទាំងអ្នកផ្ញើ និងអ្នកទទួលការទូទាត់ តាមរយៈកូដ QR ដែលអាចស្គែនបានតាមកម្មវិធី ABA Mobile, Bakong និងកម្មវិធីធនាគារតាមទូរស័ព្ទរបស់សមាជិកបាគង និងកាបូបអេឡិកត្រនិកដទៃទៀត។
ប្រសិនបើអ្នកជា ពាណិជ្ជករ ឬម្ចាស់អាជីវកម្ម ហើយចង់ទទួលយកការទូទាត់ដោយមិនប្រើសាច់ប្រាក់ពីអតិថិជននៃធនាគារ និងគ្រឹះស្ថានមីក្រូហិរញ្ញវត្ថុជាច្រើនតាមរយៈកូដ QR តែមួយ សូមទាញយក PayWay Mobile ពី Apple App Store ឬ Google Play Store នៅលើស្មាតហ្វូនរបស់អ្នក ស្នើសុំតាមអនឡាញ សម្រាប់ ABA PAY KHQR ជាប្រភេទព្រីនបាន នៅលើទំព័រ សេវាទូទាត់ប្រាក់ របស់យើង ឬប្រើ ABA ID នៅក្នុងកម្មវិធី ABA Mobile របស់អ្នក។
លោក Sanzhar Abdullayev នាយកផ្នែកកាត និងសេវាទូទាត់អេឡិកត្រូនិក ABA មានប្រសាសន៍ថា៖ "យើងខ្ញុំមានសេចក្ដីសោមន្សរីករាយ សូមប្រកាសជាផ្លូវការសេវាទូទាត់ ABA KHQR ដែលនឹងបង្កើនប្រសិទ្ធភាពនៃ ការទូទាត់បែបឌីជីថលដោយប្រើកូដ QR។ បន្ថែមពីលើភាពងាយស្រួលដែលយើងខ្ញុំផ្ដល់ជូនអាជីវករ និងម្ចាស់ អាជីវកម្មនានា អ្នកប្រើ ABA Mobile ក៏អាចធ្វើការទូទាត់ QR ងាយស្រួល ដោយមិនចាំបាច់បារម្ភថាតើហាង /អាជីវកម្មនោះមានកូដ QR ABA ឬអត់។ ជាមួយនឹងការដំណើរការជាមួយ KHQR របស់ធនាគារភាគច្រើនក្នុង ប្រទេស កម្មវិធីធនាគារទូរស័ព្ទតែមួយគត់ដែលអ្នកត្រូវការនោះគឺ ABA Mobile ដែលអ្នកអាចទូទាត់បានស្ទើរតែ គ្រប់ហាង, ភោជនីយដ្ឋាន, កន្លែងលក់ដូរ និងអាជីវកម្មនានាក្នុងស្រុក។''
KHQR ជាសមាសធាតុដ៏សំខាន់នៃគម្រោងបាគងរបស់ធនាគារជាតិនៃកម្ពុជា ដែលជាប្រព័ន្ធទូទាត់និងផ្ទេរប្រាក់ ដោយផ្អែកលើបច្ចេកវិទ្យា blockchain ។ សេវាទូទាត់នេះ ផ្ដល់ជូនឧបករណ៍ទូទាត់អន្ដរប្រតិបត្តិការនៅរវាង គ្រឹះស្ថានហិរញ្ញវត្ថុចូលរួមក្នុងគម្រោងបាគង។
ការបញ្ចូលស្ដង់ដារ KHQR ពង្រឹងបន្ថែមនូវការប្ដេជ្ញាចិត្តរបស់ ABA ក្នុងការគាំទ្រកិច្ចប្រឹងប្រែងរបស់ធនាគារជាតិ នៃកម្ពុជា សំដៅលើកកម្ពស់នវានុវត្តប្រព័ន្ធទូទាត់, បរិយាបន្នហិរញ្ញវត្ថុ, និងការប្រែក្លាយសេដ្ឋកិច្ចឌីជីថលរបស់ ប្រទេស។
