ធនាគារ ABA ពង្រីកវត្តមានរបស់ខ្លួនដោយបន្ថែមសាខាថ្មីនៅក្នុងក្រុងបាត់ដំបង
18/Dec/2023
ABA ដែលជាធនាគារពាណិជ្ជធំបំផុតនៅកម្ពុជា មានមោទនភាពសូមប្រកាសអំពីការបើកសាខាបន្ថែមនៅក្នុងក្រុងបាត់ដំបង ដែលជាទិសដៅយុទ្ធសាស្ដ្រក្នុងការពង្រីកវិសាលភាពរបស់ខ្លួន និងបំពេញតម្រូវការសម្រាប់សេវាធនាគារប្រកបដោយគុណភាពខ្ពស់ដែលបន្ដកើនឡើងនៅក្នុងតំបន់នេះ។ សាខាថ្មីនេះ នឹងបំពេញបន្ថែមសាខា ABA បាត់ដំបង ដែលមានស្រាប់ ដែលបានដំណើរការដោយជោគជ័យ និងបម្រើអតិថិជនតាំងពីឆ្នាំ 2008 មកម្ល៉េះ។
សាខាក្រុងបាត់ដំបងថ្មី ផ្ដល់ជូនផលិតផល និងសេវាកម្មរបស់ ABA ពេញលេញ។ ឥឡូវ អតិថិជននៅសង្កាត់រតនៈ ក្រុងបាត់ដំបង អាចប្រើប្រាស់ផលិតផល និងសេវាកម្មនានា ដូចជាគណនីសន្សំ និងគណនីបញ្ញើ, កម្ចីអាជីវកម្ម, កាតឥណពន្ធ និងឥណទាន, សេវាធនាគារអនឡាញ ដោយទទួលបានការប្រឹក្សាពីបុគ្គលិកវិជ្ជាជីវៈ ABA។
សាខាថ្មីនេះ ត្រូវបានបង្កើតឡើងដើម្បីបង្កើនភាពងាយស្រួល ដែលអាចចូលប្រើប្រាស់បានគ្រប់ពេលវេលា 24 ម៉ោង លើ 24 ម៉ោង សម្រាប់អតិថិជនគ្រប់រូប តាមរយៈម៉ាស៊ីនស្វ័យសេវាទំនើប រួមមានម៉ាស៊ីន ATM, ម៉ាស៊ីនដាក់ប្រាក់ និងម៉ាស៊ីនដក-ដាក់ប្រាក់ជាដើម។ រីឯ ម៉ាស៊ីនបើកកាត ABA ដែលមាននៅផ្នែកស្វ័យសេវា នៅសាខាផ្ទាល់ ក៏អនុញ្ញាតឲ្យអតិថិជនបើកកាត Visa, Mastercard, UPI និងកាតក្នុងស្រក CSS ដោយខ្លួនឯង ក្នុងរយៈពេលមិនដល់ពីរនាទី ដោយមិនចាំបាច់មានការជួយបើកជូនពីបុគ្គលិកសាខាផងដែរ។
លោក សុផន ច័ន្ទ នរិន្ទតេជ ប្រធានសាខា ABA ក្រុងបាត់ដំបង មានប្រសាសន៍ថា “ យើងខ្ញុំមានសេចក្ដីសោមនស្សរីករាយ ដែលបាននាំយកសេវាធនាគារជាទីទុកចិត្តរបស់ ABA មកកាន់បេះដូងនៃក្រុងបាត់ដំបង។ សាខាថ្មីនេះ ឆ្លុះបញ្ចាំងពីការប្ដេជ្ញាចិត្តរបស់យើង ក្នុងការបំពេញតម្រូវការឥតឈប់ឈររបស់អតថិជនសម្រាប់សេវាធនាគារទំនើប និងរួមចំណែកដល់វឌ្ឍនភាពសេដ្ឋកិច្ចប្រចាំតំបន់ដ៏រស់រវើករបស់យើង”។
សាខានេះ មានទីតាំងស្ថិតនៅលើផ្លូវជាតិលេខ 5 កែងផ្លូវ 617 ភូមិរំចេក 4 សង្កាត់រតនៈ ក្រុងបាត់ដំបង ខេត្តបាត់ដំបង (ទីតាំងផែនទី មាននៅ ទីនេះ) និងមានលេខទំនាក់ទំនង 098 206 548។
ជាមួយការបន្ថែមសាខាថ្មីនេះ បានធ្វើឲ្យ ABA បច្ចុប្បន្នមាន បណ្ដាញសាខាចំនួន 92 នៅទូទាំងប្រទេស ព្រមជាមួយនឹងទីតាំងស្វ័យសេវា ABA 24/7 ចំនួន 45។
