វិធីការពារខ្លួនពីការឆបោកលុយកាក់តាមអនឡាញ!
10/Jun/2017
ធនាគារ ABA សូមជំរាបជូនដល់អតិថិជនជាទីគោរព ស្តីអំពីការប្រុងប្រយត្ន័ចំពោះអ៊ីម៉ែលណាមួយ ដែលអះអាងថាផ្ញើចេញពីធនាគារ ABA ។
សូមលោកអ្នកមេត្តាជ្រាបថា ធនាគារ ABA មិនធ្លាប់មានការផ្ញើចេញជាអ៊ីម៉ែលសារជាអក្សរ SMS ឫក៏គេហទំព័រ Link ដែលសុំឲ្យលោកអ្នកវាយបញ្ចូលលេខកាត ឫ Internet banking ឫ ព័ត៌មានលំអិតណាមួយឡើយ។
សកម្មភាពបែបនេះត្រូវបានជនខិលខូចមួយចំនួន ប្រើប្រាស់ជាញឹកញាប់ចំពោះជនរងគ្រោះដោយការផ្ញើអ៊ីម៉ែល, គេហទំព័រក្លែងក្លាយផ្ញើសារ ឬហៅទូរស័ព្ទហើយសុំឲ្យជនរងគ្រោះផ្តល់ដល់ពួកគេនូវព័ត៌មានដូចជាលេខសម្ងាត់, ពាក្យសម្ងាត់កាត ឬគណនីធនាគារ និងពត៌មានលម្អិត ដែលអាចប្រើដើម្បីប្រព្រឹត្តការលួចបន្លំ៖
- សូមកត់ចំណាំវិធានការខាងក្រោមដើម្បីជៀសវាងការលួចបន្លំ៖សូមមានការប្រុងប្រយ័ត្នខ្ពស់ចំពោះអ៊ីម៉ែល និងទិន្នន័យផ្ទាល់ខ្លួន។
- សូមកុំឆ្លើយតបទៅនឹងអ៊ីម៉ែល ឬសារណាមួយដែលបានស្នើសុំពត៌មានហិរញ្ញវត្ថុផ្ទាល់ខ្លួន។សូមមានការប្រុងប្រយ័ត្នខ្ពស់ចំពោះអ៊ីម៉ែល ដែលជនខិលខូចបានយកទៅប្រើប្រាស់ដោយ តាំងខ្លួនជាតំនាងរបស់ ធនាគារ។ សូមជំរាបថា ធនាគារ ABA មិនដែល ប្រើប្រាស់អ៊ីម៉ែល advancebankasia.xyz, ababankofasia.xyz, advancebankofasia.xyz, ababnkofasia.xyz ឬ ក៏ អ៊ីម៉ែល ផ្សេងៗទៀតឡើយ។ ធនាគារ ABA ក៏មិនដែលស្នើរ ឲ ភាគីទីបី ណាផ្សេងទៀត ទាក់ទងអតិថិជនដើម្បីទៅទទួលយករង្វាន់ បណ្តាំមរតក និងអំណោយ នា នានោះឡើយ។
- សូមចូលមកកាន់វិបសាយធនាគារ ABA ដោយវាយអាសយដ្ឋានវិសាយឲ្យបានត្រឹមត្រូវក្នុងប្រអប់អាសយដ្ឋាន ឬអាច Bookmark ទុកក្នុង Browser របស់អ្នក។ វិបសាយរបស់យើង គឺមានអាសយដ្ឋានដែលចាប់ផ្តើមពី "https://" (ដែល "s" ខាងចុងមានន័យថា សុវត្ថិភាព) បន្ទាប់មកគឺ ababank.com។ ដូច្នេះវិបសាយផ្សេងៗដែលមានអាសយដ្ឋាន ababkonline.com, ababnkonline.com ជាវិបសាយក្លែងក្លាយ ហើយមិនមានជាប់ពាក់ព័ន្ធអ្វីនឹងធនាគារ ABA ឡើយ។
- ចូលទៅក្នុងគណនីអនឡាញរបស់អ្នកតាមទម្លាប់ធម្មតា និងពិនិត្យមើលរបាយការណ៏គណនីរបស់អ្នក ដើម្បីពិនិត្យថាតើមានប្រតិបត្តិការណាមួយគួរឱ្យសង្ស័យ ឫអត់។
- សូមរក្សាសុវត្ថិភាពកុំព្យូទ័ររបស់អ្នកដោយដោយដំឡើងកម្មវិធីកម្ចាត់មេរោគដែលមានសុពលភាព ដើម្បីការពាររាល់ពេលមានអ៊ីម៉ែលបន្លំណាមួយ ឫក៏មេរោគផ្សេងៗ ដែលអាចកត់ត្រាព័ត៌មានអំពីសកម្មភាពអ៊ីនធឺណិតរបស់អ្នក។
ប្រសិនបើអ្នកទទួលបានអ៊ីមែលដូចបានរៀបរាប់ខាងលើ សូមរាយការណ៏ជាបន្ទាន់មកកាន់ info(at)ababank.com។
ប្រសិនបើអ្នកគិតថាអ្នកប្រហែលជាអាចធ្លាក់ក្នុងអន្ទាក់នៃការលួចបន្លំទាំងនេះ សូមមេត្តាទូរស័ព្ទភ្លាមមកលេខ 023 225 333។
ដោយភក្តីភាពពី
ធនាគារABA
